ABŞ Prezidenti Donald Trampın özünəməxsus idarəçilik tərzi Amerika dollarının məzənnəsinə mənfi təsir göstərir və ölkədə inflyasiya ilə mübarizəyə ciddi zərbə vura bilər.
AFN.az "The Washington Post" qəzetinə istinadən xəbər verir ki, Trampın 2025-ci ilin yanvarında Ağ Evə qayıdışından sonra dollar öz dəyərinin 10%-dən çoxunu itirib.
Brukings İnstitutunun baş elmi işçisi, iqtisadçı Robin Bruks nəşrə müsahibəsində dolların bu il daha 10% ucuzlaşacağını proqnozlaşdırıb. Ekspertin fikrincə, investorlarda hazırkı "siyasi xaosa" qarşı instinktiv bir etibarsızlıq yaranıb. Məqalədə qeyd olunur ki, dolların zəifləməsinin əsas səbəbi Trampın qeyri-sabit siyasətidir; bura idxal rüsumları ilə bağlı qəfil qərarlar, hərbi güc tətbiqi təhdidləri və qısa müddət sonra bu addımlardan geri çəkilmələr daxildir.
"The Washington Post" yazır ki, xarici investorlar artıq bu "xaotik formalaşan siyasətdən" yorulublar. Dolların dünyada əsas ehtiyat valyuta statusunu qorumasına baxmayaraq, beynəlxalq maliyyə bazarlarında ona olan inam kəskin şəkildə sarsılıb. Analitiklər hesab edir ki, dolların zəifləmə meyli yaxın gələcəkdə də davam edəcək.
