Almaniyada ictimai nəqliyyat sektorunda çalışanların əməkhaqqı və iş şəraitinin yaxşılaşdırılması tələbi ilə başlatdığı xəbərdarlıq tətili ölkənin böyük hissəsində nəqliyyat xidmətlərini tamamilə dayandırıb.
Almaniyanın ən böyük həmkarlar ittifaqlarından biri olan Birləşmiş Xidmət Sahələri Həmkarlar İttifaqının (Ver.di) çağırışı ilə işəgötürənləri daha yaxşı iş şəraitinə məcbur etmək məqsədilə təxminən 150 bələdiyyə nəqliyyat şirkətinin əməkdaşları saat 03.00-dan etibarən 24 saatlıq tətilə başlayıblar.
Həmkarlar ittifaqı üzvlərinin işi dayandırması nəticəsində ölkədə avtobus, metro və tramvay səfərləri dayanıb. 3 fevral saat 03.00-a qədər davam edəcək aksiyadan milyonlarla sərnişin təsirlənib. Berlin, Hamburq, Münhen, Frankfurt və Köln kimi iri şəhərlərdə reyslərin böyük hissəsi ləğv edilib, bu da səhər saatlarında yollarda ciddi tıxaclara səbəb olub.
Sözügedən tətil Almaniya miqyasında hökm sürən şaxtalı hava və buzlanma riski ilə eyni dövrə təsadüf edib. Milyonlarla işçi işə getmək üçün alternativ yollar axtararkən, hüquqşünaslar xəbərdarlıq ediblər ki, nəqliyyat riski işçinin üzərinə düşür və tətil işə gecikmək üçün rəsmi üzrlü səbəb hesab olunmur. Eyni zamanda valideynlərə bildirilib ki, məktəb avtobuslarının ləğv edilməsi şagirdlərin dərslərdə iştirak öhdəliyini aradan qaldırmır.
Aşağı Saksoniya əyalətində təxminən 5 min işçiyə "sülh öhdəliyi" davam etdiyi üçün bu bölgə tətil dairəsindən kənarda saxlanılıb.
Həmkarlar ittifaqının tələbləri nələrdir?
Bələdiyyələrin nəqliyyat şirkətlərində çalışan təxminən 100 min işçi adından danışıqlar aparan Ver.di aşağıdakı tələbləri irəli sürüb: həftəlik iş saatlarının azaldılması, istirahət müddətlərinin uzadılması, növbəli iş saatlarının yenidən tənzimlənməsi və gecə və həftəsonu işləri üçün daha yüksək mükafatların ödənilməsi.
