Moskva, 2 fevral, AZƏRTAC
Təhlükəsizlik qrupunun işinin bir hissəsi olaraq, Ukrayna ilə bağlı danışıqların ikinci mərhələsi 4-5 fevral tarixlərində Əbu-Dabidə keçiriləcək.
AZƏRTAC xəbər verir ki, Rusiya Prezidentinin mətbuat katibi Dmitri Peskov görüşün əvvəlcə fevralın 1-nə planlaşdırıldığını, lakin əlavə cədvəl düzəlişlərinin tələb olunduğunu təsdiqləyib. O, Rusiyanın Ukrayna nizamlanması ilə bağlı danışıqlara açıq qaldığını qeyd edərək, prosesi mürəkkəb və çoxşaxəli adlandırıb.
Kreml sözçüsünün sözlərinə görə, Moskva hazırkı mövqeyində qalır: əgər Ukrayna Prezidenti Volodimir Zelenski Vladimir Putin ilə danışıqlar aparmaq istəyini bildirərsə, bu cür əlaqələr yalnız Moskvada mümkündür.
Fəridə Abdullayeva
AZƏRTAC-ın xüsusi müxbiri
Moskva
