Paris, 2 fevral, AZƏRTAC
Fransanın Avropa və xarici işlər naziri Jan-Noel Barro “Libération” qəzetinə verdiyi müsahibədə Parisin əsas beynəlxalq mövqelərini və prioritetlərini açıqlayıb. İranla mümkün eskalasiya riski, Ukraynaya dəstək, Avropanın Vaşinqton və Pekin arasında tutduğu mövqe, eləcə də ticarət sazişləri nazirin toxunduğu əsas mövzular olub.
AZƏRTAC xəbər verir ki, Ukrayna prezidenti Volodimir Zelenskinin bəzi tənqidlərinə münasibət bildirən Jan-Noel Barro vurğulayıb ki, hazırda Ukraynaya maliyyə yardımının əsas hissəsini Avropa təmin edir. Hərbi yardım və kəşfiyyat sahəsində də Avropanın rolu həlledicidir. Nazir Fransa və Böyük Britaniyanın təşəbbüsü ilə mümkün sülh şəraitində Ukraynanın təhlükəsizliyinin təmini ilə bağlı birgə hərbi planlaşdırmanın başladığını xatırladıb.
Rusiya haqqında danışan Barro mülki infrastruktura endirilən zərbələri və müharibə cinayətləri kimi qiymətləndirilən hücumları xatırladıb, mümkün atəşkəs müzakirələrinə baxmayaraq Kremlin mövqeyində dəyişiklik görmədiyini qeyd edib.
O bildirib ki, Fransa Ukraynaya dəstəyini davam etdirir, xüsusilə enerji böhranı fonunda generatorların göndərilməsi və Avropa tərəfdaşları ilə G7 çərçivəsində səfərbərlik buna daxildir. Paris prinsip etibarilə Rusiya ilə təmasları istisna etmir, lakin bunun Kiyev və Avropa tərəfdaşları ilə tam şəffaflıq şəraitində və Avropanın maraqlarına xidmət etməsi şərti ilə mümkün olduğunu bildirir.
İranla bağlı danışarkən Jan-Noel Barro deyib ki, İran ABŞ zərbələrindən yayınmaq istəyirsə, əsaslı güzəştlərə getməli və mövqeyini radikal şəkildə dəyişməlidir. Nazir hesab edir ki, Vaşinqton həm hərbi əməliyyat ehtimalını masada saxlayır, həm də diplomatik çıxış yolu təklif edir və Tehran bu fürsətdən yararlanmalıdır.
Vaşinqtonla son gərginliklərə toxunan Jan-Noel Barro hesab edir ki, Avropa öz təhlükəsizliyini təmin etmək üçün strateji və hərbi gücünü sürətlə artırmalıdır. Onun sözlərinə görə, Avropa həm Rusiya və Çin kimi güclərlə, həm də daha az proqnozlaşdırıla bilən ABŞ-la üz-üzədir.
Nazir Avropa birliyinin vacibliyini, xüsusilə Qrenlandiya ətrafında gedən müzakirələr fonunda vurğulayıb və Aİ-ni öz maraqlarını qorumaq üçün bütün siyasi və iqtisadi alətlərini işə salmağa hazır olmağa çağırıb.
Avropa liderlərinin Çinə son səfərlərinə münasibət bildirən Barro deyib ki, Çin–ABŞ rəqabəti XXI əsrin əsas geosiyasi çağırışıdır. Onun fikrincə, Avropa avtomatik tərəf tutmaqdan imtina edərək müstəqillik, əməkdaşlıq və çoxtərəflilik üzərində qurulan üçüncü yolu təşviq etməklə çəkisini artıra bilər.
Müsahibənin sonunda nazir Fransanın Aİ–Mercosur sazişinə qarşı çıxmasını ərzaq suverenliyinin qorunması ilə əsaslandırıb və Parisin Aİ daxilində təcrid olunduğu iddialarını rədd edib. Bunun əksinə olaraq, Hindistanla bağlanan ticarət sazişinin Avropa suverenliyi məqsədləri ilə uyğun olduğunu və tərəfdaşlıqların şaxələndirilməsi strategiyasına xidmət etdiyini bildirib.
