BAKI, 2 fevral. TELEQRAF
Slovakiyanın baş naziri Robert Fikonun milli təhlükəsizlik üzrə müşaviri Epşteynlə bağlı yeni sənədlərin açıqlanmasından sonra istefa verib.
Teleqraf xəbər verir ki, "Reuters" agentliyinin məlumatına görə, milli təhlükəsizlik üzrə müşavir Miroslav Layçak amerikalı maliyyəçi Ceffri Epşteynlə gənc qadınlar barədə elektron yazışmaların üzə çıxmasından sonra vəzifəsindən getdiyini açıqlayıb.
Layçak yaydığı bəyanatda hər hansı qanunsuzluq və ya etik pozuntuya yol vermədiyini bildirib, Epşteynin cinayətlərini isə qəti şəkildə pisləyib. Onun sözlərinə görə, açıqlanan yazışmalar qeyri-rəsmi və zarafat xarakterli olub, real məzmun daşımayıb.
O qeyd edib ki, istefa qərarını baş nazirin siyasi zərər görməməsi üçün verib və bu məsələnin hökumət rəhbərinə qarşı alətə çevrilməsini istəməyib.
Baş nazir Robert Fiko sosial şəbəkədə yaydığı videomüraciətdə Layçakın istefasını qəbul etdiyini bildirib və onu diplomatiya və xarici siyasət sahəsində böyük təcrübəyə malik şəxs kimi qiymətləndirib.
Məlumata görə, ABŞ Ədliyyə Nazirliyi cümə günü Epşteynlə bağlı milyonlarla yeni sənədi ictimaiyyətə açıqlayıb. Həmin materiallar arasında 2018-ci ilin oktyabrına aid mesajlaşmalar da yer alır. Həmin dövrdə Miroslav Layçak Slovakiyanın xarici işlər naziri vəzifəsində çalışırdı.
