BAKI, 2 fevral. TELEQRAF
İranın İnqilab Keşikçiləri Korpusunun hərbi-dəniz qüvvələrinin Hörmüz boğazında döyüş atışları ilə müşayiət olunan hərbi təlimlər keçirmək planı yoxdur.
Teleqraf xəbər verir ki, bu barədə "Reuters" agentliyinə İran rəsmisi açıqlama verib. Onun sözlərinə görə, bu məsələ ilə bağlı yayılan məlumatlar həqiqətə uyğun deyil və rəsmi açıqlamaya əsaslanmır.
Rəsmi bildirib ki, İnqilab Keşikçilərinin qeyd olunan ərazidə hərbi təlim keçirməsi ilə bağlı heç bir plan olmayıb və bu barədə rəsmi elan da verilməyib. Onun sözlərinə görə, mediada yayılan xəbərlər yanlış olub.
Qeyd edək ki, daha əvvəl İranın dövlətə məxsus "Press TV" telekanalı İnqilab Keşikçilərinin fevralın 1-2-də Hörmüz boğazında hərbi təlimlər keçirəcəyini iddia etmişdi.
Məlumatda bildirilirdi ki, təlimlərdə canlı atışlardan istifadə olunacaq. Lakin İran rəsmisinin açıqlaması bu iddiaları təkzib edib.
