Rusiya–Ukrayna münaqişəsinin nizamlanması ilə bağlı növbəti üçtərəfli danışıqlar fevralın 4 və 5-də Əbu-Dabidə baş tutacaq.
APA xəbər verir ki, bu barədə Ukrayna prezidenti Volodimir Zelenski özünün Telegram kanalında məlumat verib.
O bildirib ki, Ukraynanın danışıqlar qrupunun hesabatını dinləyib. “Ukrayna məzmunlu və konkret dialoqa hazırdır və biz nəticənin müharibənin real və ləyaqətli şəkildə başa çatmasına yaxınlaşdırmasında maraqlıyıq”, – deyə dövlət başçısı əlavə edib.
Qeyd olunur ki, əvvəlki raund üçtərəfli formatda yanvarın 23–24-də keçirilib. Bununla yanaşı, fevralın 1-də Rusiya və Ukrayna nümayəndə heyətləri ABŞ tərəfi olmadan Əbu-Dabidə danışıqlar aparacaqlar.
ABŞ-ın dövlət katibi Marko Rubio isə öz növbəsində ABŞ-ın Birləşmiş Ərəb Əmirliklərində keçiriləcək yeni görüşdə iştirak ehtimalını istisna etməyib.
***
14:10
Bu gün Əbu-Dabidə Rusiya, Ukrayna və ABŞ arasında sülh danışıqlarının ikinci raundu başlayır.
APA xəbər verir ki, bu barədə Ukrayna mediası məlumat yayıb.
Məlumata görə, ABŞ-ın dövlət katibi Marko Rubio bildirib ki, hələ də həll olunmamış əsas məsələ ərazi problemidir.
Onun sözlərinə görə, Moskva Donbasın bir hissəsi üzərində nəzarət tələb edir.
