BAKI, 1 fevral. TELEQRAF
Rəfah sərhəd-keçid məntəqəsinin bu gün atəşkəs razılaşmasına uyğun olaraq hər iki istiqamətdə piyadaların hərəkəti üçün açılması planlaşdırılır.
Teleqraf xəbər verir ki, bu barədə əldə olunan razılaşmada qeyd olunub.
İsrailin Baş naziri Benyamin Netanyahu ötən həftə bəyan edib ki, gün ərzində 50 qəzzalı və onların ailə üzvlərinin keçid vasitəsilə zolağa daxil olmasına icazə veriləcək. Qəzzanı tərk etmək istəyənlərin sayına isə heç bir məhdudiyyət qoyulmayacaq.
Lakin bu gün səhər saatlarına olan məlumata görə, hələlik keçid məntəqəsində hər hansı hərəkətlilik qeydə alınmayıb.
Ərazilərdə Hökumət Fəaliyyətlərinin Əlaqələndirilməsi İdarəsinin (COGAT) məlumatına görə, müharibə dövründə təxminən 42 min Qəzza sakini bölgəni tərk edib. Onların böyük əksəriyyəti xaricdə tibbi müalicə axtaran xəstələr və ikili vətəndaşlığı olan şəxslərdir.
Qəzzaya daxil olmaq və ya ərazini tərk etmək istəyən bütün fələstinlilərin Misirin təsdiqini alması tələb olunur. Misir tərəfindən təsdiqlənmiş adlar təhlükəsizlik yoxlaması üçün İsrailin daxili təhlükəsizlik xidməti olan “Şin Bet”ə təqdim ediləcək.
İsrail rəsmiləri bildiriblər ki, hər bir müraciət fərdi qaydada araşdırılacaq və yüksək səviyyəli silahlı qruplaşma rəhbərlərinin Qəzzanı tərk etməsinə icazə verilməyəcək.
Keçid məntəqəsində yerləşdirilmiş Fələstin Muxtariyyəti nümayəndələri və Avropa İttifaqının müşahidəçilərindən ibarət qrup Qəzzadan çıxan şəxslərin təhlükəsizlik yoxlanışını həyata keçirəcək.
İsrail yalnız Qəzzadan Misirə çıxış prosesini məsafədən nəzarətdə saxlayacaq. İdarəetmə otağından istifadə edən israilli zabitlər üz tanıma proqramı vasitəsilə keçid edən şəxslərin təsdiqlənmiş siyahıda olub-olmadığını yoxlayacaq və uyğunluq təsdiqləndikdən sonra keçid qapısı açılacaq.
Misirdən Qəzzaya daxil olan şəxslər isə Rəfah keçidini keçdikdən sonra İsrail ordusunun nəzarət-buraxılış məntəqəsində əlavə təhlükəsizlik yoxlamasından keçəcək. Yalnız bundan sonra onların HƏMAS-ın nəzarətində olan Qəzza ərazilərinə hərəkətinə icazə veriləcək.
