"Azərbaycan Hava Yolları" (AZAL) QSC ilə bağlı şikayətlər son vaxtlar artmaqdadır. Bu dəfə şirkətin reyslərində zədələnmiş baqajlar gündəm mövzusudur. Bəzi sərnişinlər rəsmi sənədləşmə (PIR protokolu) aparsalar da, aviaşirkətin zərəri ödəmək əvəzinə baqajı "təmir etdirməyi" təklif etməsindən və ya prosesin uzanmasından şikayətçidirlər.
Jurnalist Dəryanur Cavadova da eyni problemlə üzləşməsi haqda sosial şəbəkədə paylaşım edib. O bildirib ki, ötən ay İstanbula gedərkən baqajı sındırılıb: "Hava limanından ayrılmadan lazımı sənədi aldım. Prosedur qaydalarını bir-bir yerinə yetirdim. Hörmətli AZAL mail yazdı ki, get, Bakıda Kənan bəyi tap, çamadanı apar onun yanına müalicə eləsin. Mədəni surətdə bildirdim ki, mən qapı-qapı düşməli deyiləm".
D.Cavadovaya şirkətin cavabında bildirilib ki, problem qeydə alınıb və araşdırılır. Sərnişin prosesin süni şəkildə uzadılmasını süründürməçilik kimi qiymətləndirib. Digər sərnişinlər də bənzər hallarla qarşılaşdıqlarını bildiriblər.
Şövkət Ələsgərova adlı sərnişin qeyd edib ki, baqajın satış qəbzi yoxdursa, AZAL kompensasiya ödəmir: "Qəbz olmadıqda heç bir şəkildə kompensasiya etmirlər. Bilirlər ki, heç kim aldığı əşyanın qəbzini saxlayan deyil. 3 aydan çox çəkən yazışmanın sonunda dedilər ki, istəyirsiniz, gedin məhkəməyə verin".
Rəy bildirən sosial şəbəkə istifadəçiləri qeyd ediblər ki, AZAL-ın qiymətlərindəki bahalıqla göstərdiyi xidmətin keyfiyyəti arasında ciddi fərq var. Digər xarici hava yollarında bu problemin daha sivil yollarla həll edildiyi vurğulanıb.
