Bakı, 31 yanvar, AZƏRTAC
ABŞ Ədliyyə Nazirliyi maliyyəçi Ceffri Epşteynin işi ilə bağlı əlavə sənədləri ictimaiyyətə açıqlamaq niyyətindədir.
AZƏRTAC xəbər verir ki, bu barədə ABŞ Baş prokurorunun müavini Todd Blanş məlumat verib.
CNBC-nin məlumatına görə, Blanş mətbuat konfransında bildirib ki, nazirlik cümə günü təxminən 2 min video və 180 min fotoşəkil yayımlayacaq.
O qeyd edib ki, bu qərar Ədliyyə Nazirliyinin “Epşteyn işi” ilə bağlı bütün federal materialların dekabrın 19-dək açıqlanmasını tələb edən qanunun icra olunmaması ilə bağlı tənqidlər fonunda qəbul edilib.
Todd Blanşin sözlərinə görə, hazırda 500-dən çox vəkil və Ədliyyə Nazirliyinin digər əməkdaşları qanun çərçivəsində hansı materialların açıqlanmalı olduğunu müəyyən etmək məqsədilə Epşteynlə bağlı sənədləri nəzərdən keçirirlər.
