Cümə axşamı günü Venesuela parlamentinin üzvləri yekun səsvermədə genişmiqyaslı neft sənayesi islahatını təsdiqləyiblər və bu, müvəqqəti Prezident Delsi Rodrigezin vergiləri azaltmaq, Neft Nazirliyinin qərar qəbuletmə səlahiyyətlərini genişləndirmək, özəl istehsalçılara muxtariyyət vermək, habelə aktivlərin köçürülməsinə və autsorsinqə yol açmaq təklifini təkmilləşdirib.
AZƏRTAC xəbər verir ki, bu dəyişikliklərin ABŞ Prezidenti Donald Trampın bu ay təklif etdiyi 100 milyard dollarlıq sənayenin bərpası planından sonra neft və qaz hasilatını artıracağı və xarici investisiyaları cəlb edəcəyi gözlənilir.
“Dünyanın ən böyük neft yatağından resurslar çıxarmaq üçün yerli və xarici şirkətlərin rəqabətini artıracaq karbohidrogen qanunvericiliyinin islahatı üzrə sənədi yekdilliklə təsdiq etdik”, - deyə Milli Assambleyanın sədri Xorxe Rodrigez bildirib.
ABŞ rəsmilərinin vəd etdiyi kimi, Tramp administrasiyası islahat təsdiqləndikdən qısa müddət sonra ümumi lisenziya verməklə Venesuelanın enerji sənayesinə neft ixracı ilə bağlı sanksiyaları yumşaldıb.
Donald Tramp Karakas və Vaşinqton arasında 2 milyard dollarlıq nəhəng təchizat müqaviləsi bağlandıqdan sonra Venesuelanın neft gəlirlərinə qeyri-müəyyən müddətə nəzarət edəcəyini bəyan edib.
Bir çox potensial neft investorları islahatı OPEC üzvü olan ölkənin tükənmiş neft sənayesini dirçəltmək üçün ilkin investisiyaları stimullaşdırmaq istiqamətində kifayət qədər yaxşı addım hesab edirlər.
