Bakı, 29 yanvar, AZƏRTAC
Qaçqınların və Məcburi Köçkünlərin İşləri üzrə Dövlət Komitəsi və Azərbaycan Respublikasının Minatəmizləmə Agentliyi (ANAMA) işğaldan azad edilmiş ərazilərdə mina təhlükəsinə dair birgə maarifləndirici videoçarx hazırlayıb.
Dövlət Komitəsindən AZƏRTAC-a verilən məlumata görə, videoçarxda işğaldan azad edilmiş ərazilərdə fəaliyyət göstərən yük avtomobili (KamAZ) sürücüsünün taleyi əks olunur. Süjet xəttinə əsasən, sürücü yolda quraşdırılmış rəsmi mina xəbərdarlıq nişanlarını görməzdən gələrək təhlükəli zonaya daxil olur. Qayda pozuntusu və arxayınlıq sonda yük maşınının minaya düşərək partlaması ilə nəticələnir. Bu videoçarxın əsas hədəfi azad edilmiş torpaqlarda bərpa-quruculuq işlərinə cəlb olunan şəxsləri, habelə həmin ərazilərə qayıdan vətəndaşları ayıq-sayıq olmağa çağırmaqdır.
