Amerikalı agentlərin təhlükəsizlik prosesində iştirakı İtaliyada siyasi və ictimai narazılığa səbəb olub...
ABŞ növbəti ay İtaliyanın Milan və Kortina şəhərlərində keçiriləcək Qış Olimpiya Oyunlarının təhlükəsizliyi ilə bağlı tədbirlər çərçivəsində İmmiqrasiya və Gömrük Polisi Xidmətinin (ICE) bir bölməsinin əməkdaşlarını bölgəyə göndərməyi planlaşdırır.
Poliqon xəbər verir ki, bu barədə NBC News telekanalı məlumat yayıb.
ABŞ Daxili Təhlükəsizlik Nazirliyinin mətbuat katibinin sözlərinə görə, ICE-nin tərkibində fəaliyyət göstərən və transmilli cinayətkarlıqla mübarizədə ixtisaslaşan Milli Təhlükəsizlik Araşdırmaları bölməsinin agentləri oyunlar zamanı risklərin “yoxlanılması və azaldılması” prosesində iştirak edəcəklər. Qış Olimpiya Oyunları gələn həftə cümə günündən etibarən başlayacaq.
Məlumata görə, insan alveri və beynəlxalq cinayət şəbəkələri ilə bağlı araşdırmalar aparan qurumların iri beynəlxalq tədbirlərdə iştirak etməsi qeyri-adi hal sayılmır. Lakin bu bölmənin ICE ilə əlaqələndirilməsi ABŞ-də immiqrasiya siyasətinin sərtləşdirilməsi fonunda və bu ay Minnesota ştatında federal əməkdaşların iştirakı ilə baş vermiş iki ölümcül atışmadan sonra İtaliyada ciddi narazılıq yaradıb. Bir sıra italiyalı siyasətçilər və media orqanları ABŞ agentlərinin Olimpiya Oyunlarında rol almasını kəskin tənqid edib.
Milanın meri ICE-ni “öldürən bir milis qüvvəsi” adlandıraraq, bu qurumun əməkdaşlarının ev sahibi şəhərdə arzuolunmaz olduğunu bildirib. Onun sözləri İtaliya ictimaiyyətində geniş rezonans doğurub və məsələ ətrafında siyasi müzakirələri daha da alovlandırıb.
ABŞ Daxili Təhlükəsizlik Nazirliyinin mətbuat katibi Trişa Maklaflin isə tənqidlərə cavab olaraq vurğulayıb ki, ICE xarici ölkələrdə immiqrasiya qanunlarının icrası ilə bağlı əməliyyatlar aparmır. Onun sözlərinə görə, Olimpiya Oyunları zamanı ICE-nin Milli Təhlükəsizlik Araşdırmaları bölməsi ABŞ Dövlət Departamentinin Diplomatik Təhlükəsizlik Xidmətinə və ev sahibi ölkəyə dəstək göstərərək transmilli cinayət təşkilatları ilə bağlı risklərin müəyyən edilməsi və minimuma endirilməsi istiqamətində fəaliyyət göstərəcək.
Poliqon.info
