Çin hərbçiləri və tədqiqatçıları döyüş və kəşfiyyat əməliyyatları üçün effektiv sürülər yaratmaq məqsədilə yırtıcı quşların və heyvanların davranışlarını təqlid edərək süni intellektlə işləyən dronları təlim keçirirlər.
Herbiand.az bildirir ki, bu barədə The Wall Street Journal qəzeti məlumat verib.
Qeyd edilib ki, Pekin aviasiya və kosmonavtika universitetinin tədqiqatçıları hücum dronlarının hücumlardan yayınmağı öyrənə bilməsi və müdafiə dronlarının həssas hədəfləri müəyyən edə bilməsi üçün “qırğılar” və “göyərçinlər”in qarşılıqlı təsirini simulyasiya ediblər. “Beşə beş” sınağında bütün göyərçinlər 5,3 saniyədə məhv edilib.
Çin ordusu süni intellektdən dron sürülərini, robot itləri və digər avtonom sistemləri minimal insanın iştirakı ilə idarə etmək üçün istifadə edir. Sürülər kəşfiyyat dronları, düşməni sursatı istifadə etməyə məcbur etmək üçün tələlər və ya əsgərləri və texnikaları məhv etmək üçün silah kimi çıxış edə bilər.
Çin tədqiqatçıları həmçinin qarışqaların, qoyunların, çaqqalların və balinaların davranışlarını modelləşdirir, ayrı-ayrı layihələr isə qartalların və meyvə milçəklərinin gözlərinin qavranılmasını öyrənir.
Bəxtiyar CƏFƏRLİ
