Bəzi Avropa ölkələri ABŞ-ın Qəzzadakı hərbi koordinasiya mərkəzinə personal göndərməyi dayandırmağı düşünürlər.
Hafta.az yazır ki, “Reuters”ə anonimlik şərti ilə danışan diplomatlar bildiriblər ki, Avropa ölkələri Qəzzaya yardım çatdırılmasının artırılmaması səbəbindən belə bir addım atmağı planlaşdırırlar.
Mülki-Hərbi Koordinasiya Mərkəzi (MHKM) oktyabrda ABŞ prezidenti Donald Trampın Qəzza müharibəsinə son qoymaq planının bir hissəsi olaraq İsrailin cənubunda yaradılıb.
Mərkəzin vəzifəsi Qəzzada atəşkəsə nəzarət etmək, bölgəyə yardım çatdırılmasını asanlaşdırmaq və Fələstin əraziləri üçün müharibədən sonrakı siyasət hazırlamaqdır.
Almaniya, Fransa, Birləşmiş Krallıq, Misir və Birləşmiş Ərəb Əmirlikləri də daxil olmaqla bir çox ölkə MHKM-yə hərbi personal və kəşfiyyat rəsmiləri göndərib.
Lakin mənbələr bildirir ki, bəzi Avropa ölkələrinin rəsmiləri Yeni il tətilinə getdikdən sonra Qəzza sərhədi yaxınlığındakı MHKM-yə qayıtmayıblar.
Rəsmilər iddia edirlər ki, adlarını açıqlamadıqları bu ölkələr MHKM-dəki iştiraklarını azaltmağı və ya hətta personal göndərməyi tamamilə dayandırmağı düşünürlər. Qərb diplomatı ABŞ ordusunun rəhbərliyi altında fəaliyyət göstərən CMCC haqqında deyir: "Hamı bunun bir fəlakət olduğunu düşünür, amma alternativ yoxdur".
İsrail həmçinin Qəzzaya yardım çatdırılmasının artırılması üçün vacib olan Rəfah sərhəd keçid məntəqəsini açmaq istəmir.
Avropa rəsmiləri ABŞ və İsrailin açıqlamalarının əksinə olaraq, bölgəyə yardım çatdırılmasının lazımi səviyyədə olmadığını bildirirlər. Onlar CMCC-nin bu mövzudakı vədlərinin yerinə yetirilmədiyini və Təl-Əviv administrasiyasının Qəzzada yardım siyasəti üzərində dominantlığını qoruduğunu bildirirlər.
Təhlildə vurğulanır ki, Tramp administrasiyası ilə Avropa arasında münasibətlər Qəzza, Qrenlandiya və Venesuelaya qarşı son siyasətlər səbəbindən pisləşib və bunun CMCC ilə bağlı mümkün addımlarda əhəmiyyətli rol oynaya bilər. 3 yanvarda ABŞ ordusu Venesuelaya basqın edərək ölkə lideri Nikolas Maduro və həyat yoldaşı Siliya Floresi qaçırıb. Venesuela əməliyyatından sonra Tramp yenidən Qrenlandiyaya hərbi müdaxilə ilə hədə-qorxu gəlməyə başlayıb. ABŞ və İsrail rəsmilərinin daxil olduğu CMCC Trampın Qəzza sülh planının birinci mərhələsinin vacib elementi olub. Lakin Vaşinqtonun 14 yanvarda ikinci mərhələnin başladığını elan etməsi ilə bu qurumun taleyi hələ də qeyri-müəyyən olaraq qalır. ABŞ tərəfindən ikinci mərhələnin bir hissəsi olaraq yaradılan Sülh Şurası və Qəzza İdarəçiliyi üzrə Milli Komitənin CMCC ilə birgə işləyib-işləməyəcəyi də məlum deyil.
