Ali Məhkəmədə qəsdən sağlamlığa yüngül zərər vurmada təqsirləndirilən Zaman Tağıyevin (adı, soyadı şərtidir) barəsindəki qərardan verilən kassasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Vidadi Cəfərovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti təmin edilməyib.
İttihama görə, hadisə 08 noyabr 2023-cü il tarixdə saat 01 radələrində paytaxtın Xəzər rayonu ərazisində qeydə alınıb.
Belə ki, Zaman Tağıyev yaşadığı mənzildə arvadı, zərərçəkmiş Yasəmən Tağıyeva (adı, soyadı şərtidir) ilə mübahisə edib. Buna səbəb isə kişinin evə gec gəlməsi ilə bağlı qadının ona irad bildirməsi olub. Mübahisə zamanı o, arvadını qəsdən yumruq və təpiklə bir neçə dəfə vurub. Nəticədə Zaman Yasəmənin sağlamlığa yüngül zərər vurmaya aid xəsarətlər yetirib.
Xəzər Rayon Məhkəməsinin hökmü ilə o, Cinayət Məcəlləsinin 128-ci maddəsi ilə təqsirli bilinib və ona 9 ay müddətinə azadlığın məhdudlaşdırılması cəzası təyin edilib. Həmin hökmdən narazı qalan məhkumun müdafiəçisi apellyasiya şikayəti verərək, müvəkkilinin təqsirləndirildiyi maddə üzrə bəraət almasını xahiş edib. Bakı Apellyasiya Məhkəməsinin qərarı ilə apellyasiya şikayəti təmin edilməyib.
Kamal Məmmədov
