Fransada hazırda Avropa Birliyi (AB) ilə Cənub Ortaq Bazarı (MERCOSUR) arasında imzalanan azad ticarət müqaviləsinə etiraz edən və nümayiş keçirmək üçün traktorları ilə müxtəlif yerlərdən Parisə yola düşən fermerlər paytaxta çatıblar.
Milli medianın məlumatına görə, İl-de-Frans bölgəsindəki (paytaxt da daxil olmaqla) fermerlər birliklərinin rəhbərlik etdiyi ilk traktor karvanı səhər tezdən Parisə daxil olub.

Prefektura tərəfindən icazə verilən nümayişdə yüzlərlə fermer 350-dən çox traktorla paytaxtın ən işlək küçələrindən biri olan Şanzelizeyə doğru irəliləyib.Kənd təsərrüfatı sektorunda ölkənin ən böyük qurumlarından biri olan Kənd Təsərrüfatı Müəssisələri Həmkarlar İttifaqları Milli Federasiyası (FNSEA) tərəfindən əlaqələndirilən tədbirlərdə fermerlər AB-MERKOSUR müqaviləsinin onlar üçün yarada biləcəyi ədalətsiz rəqabətə qarşı təcili və konkret fəaliyyət planı tələb etdilər.
Şanzelize küçələrində nümayişlərdən sonra fermer karvanları Xarici İşlər Nazirliyi və Milli Məclis binasının qarşısında toplaşan fermerlərə qoşulmaq üçün hərəkət edəcəklər.
Hakimiyyət orqanları fermerlərin etirazları zamanı Parisdəki Sena çayı üzərindəki Konkord körpüsü və III Aleksandr körpüsünün nəqliyyatın hərəkəti üçün bağlanacağını açıqlayıb.
Parisdən başqa, ölkənin cənub-qərbində, xüsusən də La Roşel, Metz, Pau, Dax, Limoj və Perigeux şəhərlərində fermerlərin etirazları davam edir.

aia.az
Tərcümə şöbəsi

• Fransa
• Etiraz
• Paris
• Razılaşma
• Fermerlər
• Ab-Merkosur