Boğaz ağrısı xüsusilə mövsüm dəyişiklikləri zamanı geniş yayılır. Soyuqdəymə, qrip və virus infeksiyaları ilə yanaşı, quru hava və səs tellərinin həddindən artıq yüklənməsi də bu narahatlığa səbəb ola bilər.
Pravda.az bildirir ki, boğaz ağrısını yüngülləşdirmək üçün ev şəraitində tətbiq oluna bilən bir sıra təsirli üsullar mövcuddur.
Ən çox tövsiyə edilən üsullardan biri duzlu su ilə qarqaradır. İlıq suya əlavə edilən az miqdarda duz boğazdakı mikrobların azalmasına və iltihabın yüngülləşməsinə kömək edir. Gün ərzində bir neçə dəfə qarqara etmək faydalı hesab olunur.
Boğaz ağrısı zamanı bol maye qəbulu da xüsusi əhəmiyyət daşıyır. Su, bitki çayları və xüsusilə bal qatılmış ilıq içkilər boğazın yumşalmasına kömək edir. Mütəxəssislər çox isti və ya çox soyuq içkilərdən uzaq durmağı məsləhət görürlər.
Bundan əlavə, isti şorba və yumşaq qidalar boğazı qıcıqlandırmadan qidalanmağa imkan verir. Xüsusilə toyuq şorbası həm bədəni istiləndirir, həm də immun sistemini dəstəkləyir.
Qeyd edilir ki, boğaz ağrısı bir neçə gün ərzində keçməzsə, yüksək hərarət, udma çətinliyi və ya səs tutulması ilə müşayiət olunarsa, mütləq həkimə müraciət etmək lazımdır.
Əminə Bayramova
