Bakı, 12 yanvar, AZƏRTAC
Azərbaycan dilinin qorunması və inkişaf etdirilməsi strateji əhəmiyyət daşıyan milli məsələdir və bu proses yalnız dilçilərin və ya dövlət qurumlarının deyil, bütövlükdə cəmiyyətin ortaq məsuliyyətidir. Qloballaşma, rəqəmsallaşma və çoxdilli informasiya mühitinin genişlənməsi şəraitində Azərbaycan dili həm xarici təsirlərlə üz-üzə qalır, həm də yeni inkişaf imkanları əldə edir. Bu baxımdan əsas məqsəd dili süni şəkildə mühafizə etmək deyil, onu yaşayan, çevik və funksional ünsiyyət vasitəsi kimi möhkəmləndirməkdən ibarət olmalıdır.
Bu fikirləri AZƏRTAC-a açıqlamasında Şərqşünaslıq İnstitutunun Din və ictimai fikir şöbəsinin müdiri dosent Elnur Mustafayev söyləyib.
Alimin sözlərinə görə, dil siyasətinin uğuru hüquqi mexanizmlərin səmərəli icrası, ana dili təhsilinin keyfiyyətinin yüksəldilməsi, elmi-linqvistik tədqiqatların genişləndirilməsi və müasir texnologiyalarla uzlaşdırılmış terminoloji sistemin yaradılması ilə birbaşa bağlıdır. Xüsusilə rəqəmsal mühitdə Azərbaycan dilinin mövqelərinin möhkəmləndirilməsi, onun süni intellekt və informasiya texnologiyalarında istifadəyə tam uyğunlaşdırılması gələcək inkişaf üçün həlledici amillərdəndir.
“Eyni zamanda, dilin qorunması məsələsi mədəni və mənəvi dəyərlərlə sıx şəkildə əlaqəlidir. Ana dilinə hörmət, düzgün və səlis danışıq vərdişləri, ədəbi dil normalarına əməl etmək təkcə dilçilik problemi deyil, ümumi mədəniyyət göstəricisidir. Bu baxımdan ailə, məktəb, media və ictimai institutların koordinasiyalı fəaliyyəti cəmiyyətin dil şüurunun formalaşmasında mühüm rol oynayır.
Nəticə etibarilə Azərbaycan dilinin davamlı inkişafı ənənə ilə müasirliyin harmoniyasına, milli kimliklə qlobal inteqrasiyanın balansına əsaslanmalıdır. Dil yalnız keçmişin mirası deyil, həm də gələcəyin quruculuq alətidir. Onun zənginləşdirilməsi, funksional imkanlarının genişləndirilməsi və beynəlxalq elmi-mədəni dövriyyədə layiqli yer tutması Azərbaycan dövlətçiliyinin və milli-mənəvi varlığının möhkəmlənməsinə xidmət edən uzunmüddətli strateji hədəf kimi qiymətləndirilməlidir”, - deyə E.Mustafayev vurğulayıb.
