Gəncə, 12 yanvar, Elcan Məmmədov, AZƏRTAC
Azərbaycan Dövlət Aqrar Universitetində (ADAU) bir neçə gün davam edən beynəlxalq sertifikat proqramları ilə bağlı təlim və məlumatlandırma prosesi yekunlaşıb. Təlim çərçivəsində iştirakçılara “4Sİ Akademiyası – Milli Proqram” layihəsi haqqında ətraflı məlumat verilib.
ADAU-dan AZƏRTAC-ın bölgə müxbirinə bildirilib ki, layihəyə müraciət ünvanlayan ali təhsil müəssisələrinin əməkdaşları və tələbələri beynəlxalq sertifikatları tam ödənişsiz əldə etmək imkanı qazanırlar. Proqram iştirakçılarına 13 mindən artıq beynəlxalq kursdan 6 həftə müddətində pulsuz yararlanma imkanı təqdim olunur. Kursların 2500-dən çoxu Azərbaycan dilində altyazılı, ən populyar 15 kurs isə Azərbaycan dilində dublyajlıdır.
Milli proqram çərçivəsində süni intellekt, data analitikası, blokçeyn, layihə idarəçiliyi, biznes və idarəetmə, maliyyə, kənd təsərrüfatı, dil öyrənmə və digər aktual istiqamətlər üzrə prestijli kurslar təklif olunur. Əldə edilən sertifikatların CV və LinkedIn profillərinə əlavə olunması mümkündür.
Qeyd edilib ki, iştirakçılar kurslara günün istənilən vaxtında, məkan fərqi olmadan, mobil cihaz və ya kompüter vasitəsilə qoşula bilərlər.
