Bakı, 9 yanvar, AZƏRTAC
Böyük Britaniyanın mərkəzi bölgəsi son on ildə ən güclü qar yağmasına məruz qalıb. Bu ərazidə uçuşlar ləğv edilib, avtomobil və dəmir yolları bağlanıb. Küləyin sürətinin saatda 160 kilometrə çatması ilə müşayiət olunan “Qoretti” fırtınası ölkə daxilində dağıntılar yaradıb və minlərlə insan elektriksiz qalıb.
AZƏRTAC “Daily Mail” nəşrinə istinadla xəbər verir ki, Birmingem hava limanı yanvarın 8-də axşam saatlarında yağan güclü qar səbəbindən uçuş-enmə zolağını bağlamaq məcburiyyətində qalıb, Hitrou aeroportu isə əlverişsiz hava şəraiti səbəbindən onlarla aviareysi ləğv edib.
Böyük Britaniyanın qalan ərazisinin, o cümlədən London ətrafındakı qraflıqların böyük bir hissəsi güclü qar səbəbindən yüksək hazırlıq vəziyyətindədir.
“National Grid”in məlumatına görə, 65 mindən çox ev elektriksiz qalıb, bunların əksəriyyəti İngiltərənin cənub-qərbindədir. Qərbi Midlenddə 11 minə qədər, Uelsdə isə bir neçə min ev zərər görüb.
Yanvarın 9-da səhər saatlarından başlayaraq nəqliyyat marşrutlarında fasilələr müşahidə olunur və bütün ölkə üzrə məktəblər bağlanıb.
Xəbərdarlıq zonasında 10-15 santimetr qalınlığında qar yağacağı gözlənilir. Uelsdə və Pik rayonundakı daha yüksək ərazilərdə isə qarın qalınlığının 30 santimetrə çatacağı bildirilib.
Meteorologiya İdarəsi Şotlandiyanın böyük hissəsini əhatə edən qar və buzla bağlı sarı xəbərdarlıq edib. Xəbərdarlıq cümə axşamı saat 20:00-da qüvvəyə minib və cümə günü günortaya qədər davam edəcək.
Meteorologiya İdarəsi bildirib ki, şiddətli fırtına zamanı güclü küləklər ağacları yıxacaq və binalara ziyan vuracaq qədər təhlükəli ola bilər.
