ABŞ prezidenti ada dövlətinin ağır iqtisadi böhran içində olduğunu və dağılmağa çox yaxınlaşdığını bildirib...
Poliqon xəbər verir ki, ABŞ prezidenti Donald Tramp Kubanın hazırda son dərəcə ağır vəziyyətdə olduğunu və faktiki olaraq “ipdən asılı qaldığını” bəyan edib. Onun sözlərinə görə, uzun illər Kuba Venesueladan neft və maliyyə dəstəyi alaraq ayaqda qalıb, lakin bu mənbələrin zəifləməsi fonunda ada dövləti dərin böhranla üzləşib və iflasa çox yaxındır.
Qeyd edək ki, Donald Tramp bu fikirləri radio aparıcısı Hyu Hyuittlə söhbəti zamanı səsləndirib. Aparıcı Vaşinqtonun Kubaya qarşı təzyiqləri artırmasının vaxtının çatıb-çatmadığını soruşaraq, Kuba hökumətinin ölkə əhalisinin “canını sovurduğunu” iddia edib. Tramp isə cavabında bildirib ki, açıq desək, Kubaya daha hansı formada təzyiq göstərməyin mümkün olduğunu bilmir və bunu yalnız hərbi müdaxilə ilə əlaqələndirib.
ABŞ prezidenti əlavə edib ki, Kuba artıq son 25 ildir ağır iqtisadi və sosial vəziyyətdədir. Onun fikrincə, ölkə hələ tam çökməsə də, hazırkı siyasətin nəticəsi olaraq bu nöqtəyə son dərəcə yaxınlaşıb. Tramp vurğulayıb ki, mövcud böhran əsasən Kuba rəhbərliyinin öz qərarlarının nəticəsidir.
Xatırladaq ki, yanvarın əvvəlində ABŞ dövlət katibi Marko Rubio da Kuba hökumətini Vaşinqton üçün “böyük problem” adlandırmışdı. Jurnalistin ABŞ-nin Venesuela nümunəsində olduğu kimi Kubada hərbi əməliyyat keçirməyi planlaşdırıb-planlaşdırmadığı sualına o, birbaşa cavab verməsə də, Ağ Evin Kuba rejiminə rəğbət bəsləmədiyini açıq şəkildə ifadə etmişdi.
Poliqon.info
