ABŞ prezidenti sənədin təsdiqləndiyini desə də, onun tətbiqinə ehtiyac qalmayacağına ümid etdiyini vurğulayıb...
Poliqon xəbər verir ki, ABŞ prezidenti Donald Tramp Rusiyaya qarşı sanksiyaların sərtləşdirilməsini nəzərdə tutan qanun layihəsini dəstəklədiyini açıqlayıb. Bununla yanaşı, o, Vaşinqtonun bu mexanizmdən istifadə etməyə məcbur qalmayacağına ümid etdiyini bildirib.
Tramp qeyd edib ki, ABŞ artıq Rusiyaya qarşı kifayət qədər genişmiqyaslı sanksiyalar tətbiq edir. Onun sözlərinə görə, Rusiya iqtisadiyyatının vəziyyəti ağırdır, lakin ölkə iqtisadi və hərbi potensial baxımından Ukraynadan xeyli böyükdür. Prezident bu fikirləri Fox News telekanalına müsahibəsində səsləndirib.
Daha əvvəl senator Lindsi Qrem bildirmişdi ki, sözügedən qanun layihəsi üzrə səsvermə gələn həftə keçiriləcək. Senatorun sözlərinə görə, sənəd ABŞ prezidentinə Rusiyadan neft və qaz almaqda davam edən ölkələrə qarşı ikinci dərəcəli sanksiyalar və idxal rüsumları tətbiq etmək səlahiyyəti verəcək. Qrem vurğulayıb ki, qanun layihəsi Konqresdə həm demokratların, həm də respublikaçıların böyük əksəriyyəti tərəfindən dəstəklənir.
Yeni təşəbbüsün məqsədi Rusiyanın enerji ixracından əldə etdiyi gəlirləri məhdudlaşdırmaq və Moskvanın beynəlxalq bazarlardakı iqtisadi manevr imkanlarını daraltmaqdır. Ağ Ev isə paralel olaraq diplomatik və iqtisadi təzyiq alətlərinin müharibənin genişlənməsinin qarşısını almaq üçün yetərli olacağına ümid etdiyini gizlətmir.
Poliqon.info
