Yüzlərlə şirkət Trampı MƏHKƏMƏYƏ VERİB
Ajans.az Bloomberg-ə istinadən xəbər verir ki, minlərlə firma indiyə qədər ödənilən milyardlarla dollarlıq tariflərin bir hissəsini geri almağa ümid edir. 10 dekabr tarixinə olan məlumata görə, ABŞ Gömrük orqanları ölkəyə daxil olan 34 milyon mal daşınması üzrə 301.000-dən çox idxalçıdan idxal rüsumları toplayıb. Bu ödənişlər 200 milyard dollardan çox tariflərin əhəmiyyətli hissəsini təşkil edir. Hökumətin hesabatlarına görə, 14 dekabr tarixinə qədər təxminən 133 milyard dollar toplanıb. Əgər Ali Məhkəmə prezidentin əleyhinə qərar çıxararsa və müəssisələr geri ödəmə hüququna malik olarsa, Tramp bunun “milli təhlükəsizlik üçün fəlakət” olacağını vurğulayıb. Lakin tariflərin qanunsuz olduğu aşkar edilərsə, ABŞ Beynəlxalq Ticarət Məhkəməsi (CIT) vasitəsilə kompensasiya tələb oluna bilər. Məhkəmə iddialarına dünyanın ən böyük mağaza şəbəkəsi olan Costco, eynək istehsalçısı EssilorLuxottica, təkər təchizatçısı Goodyear Tire & Rubber Co., eləcə də Amerika alüminium istehsalçısı Alcoa, Yaponiyanın avtomobil hissələri şirkətləri Yokohama və Kawasaki, idman ayaqqabıları istehsalçıları Reebok və Puma, Tommy John geyimləri, GoPro kameraları, şəxsi qulluq məhsulları istehsalçıları Schick və Playtex, kosmetika firmaları Revlon və Conair, qida şirkətləri Bumble Bee və Del Monte Fresh Produce kimi yerli və xarici bir çox şirkət daxil olub. Yeni Vətəndaş Azadlıqları Alyansının baş məhkəmə vəkili Con Vekkione bildirib: "Hamısı bu işə qoşulur." Ticarət vəkili Erik Smitveys isə qeyd edib ki, bəzi şirkətlər, xüsusən yüksək profilli olanlar, yazda qüvvəyə minən tariflərə qarşı mübarizəyə rəhbərlik etməyin “siyasi əks-sədasından” qorxurlar. Lakin ilin sonu yaxınlaşdıqca, iddiaların qanunsuz olduğu aşkar edilərsə, kompensasiya almaq üçün bütün mümkün addımların atılması təzyiqi artır.
