Almaniya Rusiya ilə müharibəyə HAZIRLAŞIR
Ajans.az xəbər verir ki, təxminən 1200 səhifədən ibarət sənəd üzərində iş son iki il yarım ərzində aparılıb. Məlumata əsasən, plan Almaniya, ABŞ və digər müttəfiq ölkələrdən təxminən 800 min hərbçinin NATO-nun şərq cinahına yerləşdirilməsini nəzərdə tutur. Sənəddə limanların, çay yollarının, magistral avtomobil yollarının və dəmir yolu xətlərinin istifadəsi, eləcə də qoşunların hərəkəti zamanı logistika, təminat və təhlükəsizlik mexanizmləri ətraflı təsvir edilib. Nəşrin yazdığına görə, plan tam səfərbərlik modelinə əsaslanır və mülki ilə hərbi strukturlar arasındakı sərhədlərin şərti olaraq aradan qalxmasını nəzərdə tutur. Bu yanaşma Soyuq Müharibə dövrünün strateji konsepsiyalarını xatırlatsa da, sənəd müasir çağırışları — Almaniyanın köhnəlmiş infrastrukturu, müdafiə sahəsində normativ boşluqları və azaldılmış ordunu — nəzərə alır. Planın müəlliflərindən biri anonim şəkildə bildirib ki, sənədin əsas məqsədi potensial rəqibə hücumun uğursuzluqla nəticələnəcəyini göstərməklə münaqişənin qarşısını almaqdır. Zəruri dəyişikliklərin miqyası payız aylarında keçirilən hərbi təlimlər zamanı daha aydın üzə çıxıb. Rheinmetall şirkəti qısa müddətdə 500 nəfərlik səhra düşərgəsi qurmağa nail olsa da, təlimlər logistika və qoşunların daşınması sahəsində ciddi sistem problemlərini ortaya qoyub. Hətta hərbi karvanların hərəkəti üçün işıqforların tənzimlənməsi kimi detallar da sənədləşdirilib və hazırda tamamlanmaqda olan planın ikinci versiyasına daxil edilib. Məqalədə qeyd olunur ki, sülh dövrlərində qəbul edilmiş bir sıra qanunvericilik normaları — dövlət satınalmalarının mürəkkəb qaydaları, sərt məlumatların qorunması qanunları və digər məhdudiyyətlər — planın icrasına ciddi maneə yaradır. Bu problemlərin aradan qaldırılması üçün, nəşrin ifadəsi ilə desək, “düşüncə tərzinin yenilənməsi” tələb olunur.
