İsrail Fələstin dövləti ideyasını aradan qaldırmağı hədəfləyən qanunsuz E1 məskunlaşma layihəsinin həyata keçirilməsi üçün işə başlayıb.
Hafta.az yazır ki, Təl-Əviv administrasiyası Qərb Sahilini iki yerə bölməklə 3401 qanunsuz məskunlaşma vahidinin inşasını nəzərdə tutan layihə üçün tenderlər açıb.
“The Guardian”ın məlumatına görə, təkliflərin təqdim edilməsi üçün son tarix mart ayının ortalarıdır.
Qərb Sahilidəki qanunsuz məskunlaşmaları izləyən “Peace Now” QHT ilə əməkdaşlıq edən “Settlement Watch” təşkilatının həmtəsisçisi Yonatan Mizraçi deyir ki, bu addım E1 layihəsi çərçivəsində tikintini sürətləndirmək üçün atılıb: “Bu vaxt xəttinə görə, buldozerlər bir ildən az müddətdə işə başlaya bilər”.
E1 layihəsinin son versiyası avqust ayında radikal sağçı İsrail maliyyə naziri Bezalel Smotriç tərəfindən elan edilib və həmin ay İsrail Mülki Administrasiyasının Ali Planlaşdırma Şurası tərəfindən təsdiqlənib.
İsrail Tikinti və Mənzil Nazirliyi də sentyabr ayında Baş nazir Benyamin Netanyahunun iştirakı ilə keçirilən mətbuat konfransında layihənin maliyyələşdiriləcəyini açıqlayıb. Açıqlamada bildirib: "Biz dedik ki, Fələstin dövləti olmayacaq və həqiqətən də Fələstin dövləti qurulmayacaq! Bura bizimdir".
Layihənin məqsədi Maale Adumim yaşayış məntəqəsi ərazisində yaşayış binaları tikməklə Şərqi Qüds ilə Qərb Şəriyəsi arasındakı əlaqəni kəsməkdir. Bu, Qüdsü qanunsuz yaşayış məntəqəsi ilə birbaşa əlaqələndirəcək.
E1 layihəsi uzun müddətdir gündəmdə idi, lakin beynəlxalq ictimaiyyətin reaksiyası səbəbindən təxirə salınıb. Smotrichin layihənin təsdiqlənəcəyini açıqlaması mübahisəni yenidən alovlandırıb.
Fələstin Milli Hakimiyyəti, Türkiyə, Avropa İttifaqı və Körfəz ölkələri Qərb Sahilindəki Fələstin ərazilərini ayırmağı və Qüdsü hər tərəfdən Fələstin torpaqlarından təcrid etməyi planlaşdıran E1 layihəsinə etiraz ediblər.
Mizraçi layihənin Fələstin dövlətinin gələcəyini məhv edəcəyinə diqqət çəkir: “E1 layihəsi aparteid rejiminə çevriləcək tək dövlət reallığına gətirib çıxaracaq dönməz bir vəziyyət yaratmağı hədəfləyir”.
Peace Now təşkilatından Hagit Ofran da qeyd edir ki, məskunlaşma planı təsdiqləndikdən sonra tender hazırlıqları adətən altı aydan bir ilə qədər çəkir, lakin E1 tikintisi üçün bu müddət cəmi dörd aya endirilib.
Qalib təkliflər tender bağlandıqdan bir neçə gün sonra elan edilə bilər. Növbəti mərhələdə müqavilənin təfərrüatları müəyyən edilir. Bir neçə həftə çəkən bu prosesdən sonra müqavilələr imzalandıqdan sonra tikinti üçün bələdiyyədən icazə tələb olunur. Bildirilir ki, bu, bir neçə ay ərzində başa çatdırıla bilər.
Proses bu sürətdə davam edərsə, layihə oktyabrda keçirilməsi planlaşdırılan qanunvericilik seçkilərindən əvvəl başlaya bilər.
