İranın Azərbaycanla həmsərhəd olan Biləsuvar şəhərində yerləşən Ərdəbil Azad Ticarət və Sənaye Zonası, hüquqi prosedurları və infrastruktur tədbirlərini tamamladıqdan sonra əməliyyat və investisiya cəlb etmə mərhələsinə qədəm qoyub. Bura, xüsusilə də, Türkiyə və Azərbaycandan olan investorların diqqətini çəkmədədir.
Hafta.az yazır ki, Ərdəbil Xüsusi İqtisadi Zonası İslam Şurası Məclisinin vahid maddəsinə əsasən yaradılıb və nizamnaməsi hökumət tərəfindən 2024-cü ilin fevralında təsdiq edilib. Nizamnaməsinin 5-ci maddəsində bu təşkilatın əsas məqsədləri iş yerlərinin yaradılması, ixracın artırılması, investisiyaların cəlb olunması və inkişaf etdirilməsi, istehsal və ticarətin asanlaşdırılması kimi müəyyənləşdirilib.
Biləsəvardakı bu kompleksin istifadəyə verilməsi ötən il fevralın 12-də Ərdəbil Azad Ticarət və Sənaye Zonasının baş direktoru və direktorlar şurası üzvlərinin təqdimatı ilə əsas mərhələyə qədəm qoyub.
Ərdəbil Azad Zonası, Azad Ticarət, Sənaye və Xüsusi İqtisadi Zonaların Ali Şurasının katibinin sözlərinə görə, ölkədə ixtisaslaşmış tapşırıq və missiyaları yerinə yetirmək üçün yeni bir yanaşma ilə yaradılan 10 azad zonadan dördüncüsüdür.
Ərdəbil valisi Məsud İmami Yeganə ilə Azərbaycan və Türkiyədən iqtisadi-ticarət sferası nümayəndələrinin görüşü bu bölgəyə diqqəti cəlb etməkdə dönüş nöqtəsi olub. İRNA yazır ki, valinin bu yaxınlarda Bakıya səfəri zamanı uğurlu məsləhətləşmələrindən sonra Ərdəbilə gələn nümayən heyətləri, Ərdəbil Azad Zonasında istehsal, ticarət və xidmət sektorlarına investisiya qoymaqda özlərinin və müvafiq ölkələrinin bizneslərinin ciddi maraqları olduğunu bildiriblər.
Bu maraq tranzit yeri, gömrük güzəştləri və sözügedən bölgədəki investorlar üçün xüsusi imkanlar nəticəsində qiymətləndirilir. İqtisadçı ekspertlər hesab edirlər ki, Ərdəbil Azad Zonasının imkanlarının tam reallaşdırılması onu ölkənin şimal-qərbinin mühüm iqtisadi mərkəzlərindən birinə çevirə bilər.
Xarici investisiyaların cəlb edilməsi təkcə yeni iş yerlərinin yaradılmasına, texnologiya transferinə və ticarət həcminin artmasına səbəb olmayacaq, həm də qonşu ölkələrlə mədəni və siyasi əlaqələrin gücləndirilməsində amil rolunu oynayacaq.
Ərdəbil valisi həmçinin qarşıdakı imkanlardan ən yaxşı şəkildə istifadə etmək üçün bu bölgədə iqtisadi göstərici proqramlarının sürətli və dəqiq şəkildə izlənilməsinin vacibliyini vurğulayıb.
Biləsuvarda Azad Zona Təşkilatının ofisinin yaradılması ilə bu sərhəd şəhəri əyalətin sərhədlərarası qarşılıqlı əlaqələrdə əsas nüvəsi və ticarət qapısı kimi müəyyən edilib. Onun imtiyazlı coğrafi mövqeyi və Azərbaycan Respublikasına yaxınlığı Biləsuvarı iqtisadi mübadilələrin təbii mərkəzinə çevirib, onun azad zona kimi inkişafı bütün Ərdəbil əyalətinə, hətta ölkənin şimal-qərb bölgəsinə fayda verəcək.
Tamamlanmaqda olan infrastruktur və Biləsuvarın strateji mövqeyinə əsaslanan Ərdəbil Azad Ticarət və Sənaye Zonası kağız üzərindəki plandan, xüsusən də Türkiyə və Azərbaycan investorları üçün sərmayə qoymaq baxımından əsl məkana çevrilib.
Bu bölgə İranla qonşu bazarlar arasında güclü rabitə və iqtisadi körpü olmaq, Ərdəbil əyalətinin və bölgənin iqtisadi inkişafında mühüm rol oynamaq potensialına malikdir.
