Lənkəran Ağır Cinayətlər Məhkəməsində yol qəzası törətməkdə təqsirləndirilən Ramil Rəsulovun cinayət işi üzrə məhkəmə iclası başa çatıb.
Pravda.az-ın əldə etdiyi məlumata görə, hakim Neymət Məmmədovun sədrliyi ilə keçirilən prosesdə hökm oxunub.
Məhkəmənin hökmü ilə cəzasını məntəqə tipli cəzaçəkmə müəssisəsində çəkməklə ona 5 il müddətə azadlıqdan məhrumetmə cəzası təyin edilib.
İttihama görə, hadisə 20 iyul 2025-ci il tarixdə, saat 22:10 radələrində Sabirabad rayonu, Xəlfəli kəndində qeydə alınıb.
Belə ki, Ramil Rəsulov idarə etdiyi “VAZ-21070” markalı avtomobillə hərəkətdə olarkən piyada, zərərçəkmiş Sürət Əzizovu vurub. Ağır xəsarət alan hərəkət iştirakçısı hadisə yerində ölüb.
Məhkəmə iclasında dindirilmiş zərərçəkmiş şəxsin hüquqi varisi ifadəsində bildirib ki, Sürət Əzizov onun həyat yoldaşı olub. Onun sözlərinə görə, 20 iyul 2025-ci il tarixdə axşam saatlarında Sürət yaşadıqları evdən çıxaraq kənddə yerləşən mağazaya işıq kartına pul köçürmək üçün gedib. Bir qədər sonra qonşularından Sürətin kənd ərazisində avtomobil vurması nəticəsində xəsarət aldığını eşidiblər.
Hadisə yerinə gedib qayıdan qayınanası bildirib ki, Sürəti həmkəndliləri olan təqsirləndirilən şəxs “VAZ-21070” markalı avtomobillə vurub və o, xəstəxanaya aparılıb. Daha sonra məlum olub ki, əri aldığı xəsarətlər nəticəsində hadisə yerində həyatını itirib və meyiti məhkəmə-tibbi ekspertizadan keçirilməsi üçün xəstəxananın morquna təhvil verilib.
Zərərçəkmiş şəxsin hüquqi varisi ifadəsində həmçinin qeyd edib ki, təqsirləndirilən şəxs ilə barışıb, ona qarşı hər hansı şikayəti və tələbi yoxdur. Onun sözlərinə görə, Ramil Rəsulov tərəfindən ailəyə 15 000 manat məbləğində pul ödənilib və vurulmuş maddi ziyan tam şəkildə ödənilib.
O, məhkəməyə barışığa dair ərizəni könüllü şəkildə təqdim etdiyini, həmçinin təqsirləndirilən şəxs barəsində azadlıqdan məhrumetmə ilə bağlı olmayan cəzanın təyin olunmasını xahiş etdiyini bildirib.
Kamal Məmmədov
