Türkiyə Super Liqasında mövsümün ikinci yarısına hazırlaşan "Fənərbağça" transfer səylərini sürətləndirib.
Fanat.Az xəbər verir ki, İstanbul nəhəngi Antoni Musabanın transferindən sonra yarımmüdafiə xəttinə ulduz futbolçu gətirir.
"Sarı-lacivərdlər" İtaliya A Seriyası təmsilçisi "Latsio"da oynayan Matteo Genduzi ilə razılığa gəlib.
İnformasiyanı tanınmış insayder Fabritsio Romano yayıb. Müqavilənin təfərrüatları da dəqiqləşdirilib. "Fənərbağça" fransız futbolçu ilə 4,5 illik müqavilə və 1 illik seçim imkanı barədə razılığa gəlib. Transfer haqqına gəlincə, tərəflər arasında bonuslar da daxil olmaqla, ümumilikdə 30 milyon avro məbləğində razılaşma əldə edildiyi bildirilir.
Genduzinin 11 yanvarda - bazar günü keçiriləcək "Verona" - "Latsio" matçından sonra İstanbula gələcəyi gözlənilir.
Karyerasına PSJ-nin futbol akademiyasında başlayan 26 yaşlı yarımmüdafiəçi "Loryan", "Arsenal", "Herta", "Olimpik Marsel" və "Latsio" kimi klublarda oynayıb.
Genduzi bu mövsüm "Latsio"da 16 oyuna çıxaraq 2 qol vurub və 1 məhsuldar ötürmə edib.
