Müvəqqəti hakimiyyətlə razılaşma Vaşinqtonun nəzarəti altında həyata keçiriləcək...
ABŞ prezidenti Donald Tramp Venesuelanın müvəqqəti hakimiyyətinin ABŞ-yə 30–50 milyon barel həcmində neft ötürəcəyini bəyan edib.
Poliqon xəbər verir ki, Tramp bu barədə özünün Truth Social sosial şəbəkəsində paylaşım edib.
ABŞ prezidentinin sözlərinə görə, sözügedən neft bazar qiymətləri ilə satılacaq və satışdan əldə edilən vəsait birbaşa Vaşinqtonun nəzarəti altında saxlanılacaq. O bildirib ki, bu addım gəlirlərin həm Venesuela xalqının, həm də ABŞ-nin maraqları naminə istifadə olunmasına zəmanət vermək məqsədi daşıyır. Tramp qeyd edib ki, bu prosesə ABŞ prezidenti kimi şəxsən nəzarət edəcək.
Donald Tramp əlavə edib ki, neft Venesueladan ABŞ ərazisinə tanker gəmiləri vasitəsilə daşınacaq və birbaşa Amerika anbarlarında boşaldılacaq. Onun sözlərinə görə, bu mexanizm həm logistik baxımdan, həm də kommersiya nəzarəti baxımından daha səmərəli hesab olunur.
Xatırladaq ki, yanvarın 5-i axşam saatlarında Venesuelanın vitse-prezidenti Delsi Rodriges ölkənin prezident səlahiyyətlərini icra edən şəxs kimi and içib. Donald Tramp daha əvvəl bir neçə dəfə bəyan etmişdi ki, Rodriges administrasiyası ABŞ ilə sıx əməkdaşlıqda maraqlıdır və Vaşinqtonla münasibətlərin bərpasını prioritet hesab edir.
Analitiklərin fikrincə, neftlə bağlı bu razılaşma Venesuelanın dərin iqtisadi böhrandan çıxarılması üçün əsas alətlərdən biri kimi təqdim olunur. Eyni zamanda, bu addım ABŞ-nin Venesuela enerji sektorunda təsir imkanlarını əhəmiyyətli dərəcədə artırır və regionda geosiyasi balansın dəyişməsinə səbəb ola bilər.
Poliqon.info
