Nvidia-nın CEO-su Censen Huang Las-Veqasda keçirilən CES 2026 texnologiya sərgisində avtonom avtomobillərin insan kimi düşünməsinə kömək edəcəyi bildirən “Alpamayo” platformasını açıqlayıb.
Şirkət bildirib ki, bu yeni texnologiya avtomobillərə nadir hallarda qarşılaşdıqları vəziyyətlərdə məntiq yürütmə, mürəkkəb mühitlərdə təhlükəsiz sürüş təmin etmə və sürüş qərarlarını açıqlama bacarığı qazandıracaq.
Huang bu inkişafı fiziki süni zəka üçün “ChatGPT anı” kimi qiymətləndirib. Alpamayo platforması Hugging Face üzərindən açıq mənbə modeli kimi tədqiqatçıların istifadəsinə təqdim olunub. Bu addım Nvidia-nın avtonom sürüş sahəsində yalnız aparat deyil, həm də proqram təminatı və ekosistem liderliyini gücləndirmə strategiyasının bir hissəsi kimi qiymətləndirilir.
Mercedes-Benz ilə strateji əməkdaşlıq
Nvidia-nın bu yeni texnologiya ilə gücləndirilmiş ilk sürücüsüz avtomobil Alman avtomobil istehsalçısı Mercedes-Benz ilə birgə hazırlanmış CLA modeli olacaq. Açıqlamaya görə, Nvidia-nın bütün avtonom sürüş proqram paketini əhatə edən Mercedes-Benz CLA ilin birinci rübündə ABŞ-da satışa çıxarılacaq. Avtomobilin ilin ikinci rübündə Avropaya, ilin sonuna yaxın isə Asiya bazarına təqdim olunması planlaşdırılır.
San-Fransisko küçələrində keçirilmiş video nümayişdə süni zəka dəstəyi ilə hərəkət edən avtomobilin insan sürücülərin müdaxiləsi olmadan təbii şəkildə hərəkət etdiyi və aldığı qərarları eyni zamanda açıqlaya bildiyi göstərilib. Analitiklər bu addımı Tesla-nın Autopilot proqramına birbaşa rəqib kimi qiymətləndirir.
Yeni nəsil Rubin çiplərin kütləvi istehsalı başlayır
Sərgidə Nvidia-nın gələcək aparat strategiyasına dair vacib məlumatlar da paylaşılıb. Huang şirkətin yeni nəsil süni zəka çipi olan “Vera Rubin”in kütləvi istehsalına başlandığını açıqlayıb. 2024-cü ildə təqdim olunan bu qurğunun mövcud Blackwell çiplərinə nisbətən beş dəfə daha yüksək çıxış performansı təqdim etdiyi bildirilib.
Rubin platformasının ilin ikinci yarısında tam gücü ilə bazara çıxması gözlənilir. Daha az enerji sərfiyyatı ilə daha yüksək hesablama gücü təqdim edən bu aparatın süni zəka texnologiyalarının inkişaf xərclərini azaltması və avtonom sistemlərin yayılmasını sürətləndirməsi gözlənilir.
