Cənubi Koreya avtomobil nəhəngi Hyundai Motor Group dünya üzrə fabriklərində 2028-ci ildən etibarən insanabənzər robotlardan istifadə etməyə başlayacağını açıqlayıb. Las-Veqasda keçirilən İstehlak Elektronikasının Sərgisi (CES) çərçivəsində Boston Dynamics tərəfindən hazırlanmış Atlas adlı robot təqdim edilib.
Hyundai Atlas robotunu ABŞ-ın Georgia ştatındakı zavodu da daxil olmaqla, qlobal şəbəkəsinin bütün müəssisələrinə inteqrasiya etməyi planlaşdırır. Şirkət rəsmiləri bildirib ki, insanabənzər robotlar ilkin mərhələdə fiziki baxımdan çətin və təhlükəli vəzifələri icra edəcək, zamanla isə daha mürəkkəb işlərdə insanlarla birlikdə avtonom şəkildə çalışacaqlar.
Məşğulluq və texnologiya yatırımları
Hyundai-nin vitse-prezidenti Caehoon Chang robotların insanların işlərini əlindən alacağı barədə narahatlıqlara toxunub. Chang qeyd edib ki, robotların təlimi və idarə olunması kimi sahələrdə insan əməyinə ehtiyac olacaq.
Şirkət daha əvvəl ABŞ-da istehsalı artırmaq məqsədilə Donald Trampın planlarını dəstəkləyərək 20 milyard dollardan çox investisiya edəcəyini açıqlamışdı. Bu investisiyalar avtonom sürüş texnologiyaları və süni intellekt sahələrini də əhatə edir. Hyundai ilə yanaşı Amazon, Tesla və Çinin BYD kimi iri şirkətləri də əməliyyatlarında insanabənzər robotlardan istifadə etmək üçün çalışırlar.
Georgia zavodundakı vəziyyət
Atlas robotlarının istifadə ediləcəyi zavodlar arasında yer alan Georgia ştatındakı batareya fabriki 2025-ci ildə genişmiqyaslı miqrant əməliyyatı ilə gündəmə gəlmişdi. Əməliyyat zamanı aralarında 300 Cənubi Koreyalı işçinin də olduğu yüzlərlə işçi saxlanmış və bu hadisə Cənubi Koreyada böyük etirazla qarşılanmışdı.
Cənubi Koreya Prezidenti Li Cae Myung və Hyundai CEO-su Xose Munoz belə müdaxilələrin xarici investisiyaları qorxuda biləcəyinə dair xəbərdarlıq etmişdilər. Yaşanan böhranın ardından Vaşinqton və Seul rəhbərliyi işçilərin azad edilməsi üzrə razılığa gəlmiş və Ağ Evin hadisə ilə bağlı Hyundai rəhbərliyinə təəssüfünü bildirdiyi açıqlanmışdı.
