Vaşinqton əsas dəniz marşrutlarında nəzarət və sərbəst gəmiçiliyi prioritet hesab edir...
ABŞ hakimiyyəti öz hərbi-dəniz donanmasının dünya üzrə bütün əsas dəniz marşrutlarında sərbəst hərəkətini təmin etməyi qarşısına məqsəd qoyub.
Poliqon xəbər verir ki, bu barədə Pentaqonun rəhbəri Pit Hegset ABŞ-nin Virciniya ştatında yerləşən gəmiqayırma zavoduna səfəri zamanı açıqlama verib.
Onun sözlərinə görə, prezident Donald Trampın administrasiyası dövründə ABŞ dənizlər üzərində nəzarətin gücləndirilməsinə və əsas beynəlxalq dəniz yollarında gəmiçiliyin azadlığının təmin olunmasına xüsusi önəm verir.
“Trampın prezidentliyi dövründə ABŞ dənizlər üzərində nəzarətin qurulmasına və dünya üzrə bütün əsas dəniz marşrutlarında sərbəst hərəkətin təmin edilməsinə ciddi diqqət ayırır”, deyə Pit Hegset bildirib.
Pentaqon rəhbəri vurğulayıb ki, bu məqsədə nail olmaq üçün ABŞ “daha böyük, daha müasir və daha öldürücü” hərbi-dəniz donanması formalaşdırır. Onun sözlərinə görə, Vaşinqton yalnız yaranan təhlükələrə reaksiya verən deyil, qlobal miqyasda üstünlüyü təmin edə bilən silahlı qüvvələr yaratmaq niyyətindədir.
Hegset əlavə edib ki, ABŞ donanmasının gücləndirilməsi ölkənin strateji maraqlarının qorunması, müttəfiqlərin təhlükəsizliyinin təmin olunması və beynəlxalq ticarət yollarının açıq saxlanılması baxımından əsas prioritetlərdən biridir. Analitiklərin fikrincə, bu yanaşma ABŞ-nin qlobal dəniz siyasətində daha sərt və fəal xətt yürütməyə hazırlaşdığını göstərir.
Poliqon.info
