Zumerlər və minilliklər getdikcə işdən uzun fasilələr alır və səyahətlərə çıxırlar.
QHT.az xəbər verir ki, turizm sənayesində yeni trend – “mikropensiya” gənclər arasında sürətlə populyarlaşır. Z nəsli və minilliklər ənənəvi təqaüd yaşını gözləmədən bir neçə aydan bir ilə qədər işə fasilə verərək səyahət etməyə üstünlük verirlər. Məqsəd tükənmənin qarşısını almaq, həyat balansını qorumaq və yeni təcrübələr qazanmaqdır.
Mütəxəssislər bildirir ki, məsafədən iş və frilans imkanlarının artması bu modeli daha əlçatan edib. Sorğulara əsasən, respondentlərin 54%-i mikropensiyanın “burnout”u azaltdığını düşünür.
2026-cı ildə gənclər üçün ən populyar mikropensiya istiqamətləri arasında Banqkok, Hanoy, Lissabon, Budapeşt və Daşkənd yer alır. Bu şəhərlər aşağı yaşayış xərcləri, inkişaf etmiş infrastruktur və rahat həyat tərzi ilə seçilir.
R.İmanov
