Polşa hökuməti mart ayından etibarən ukraynalı qaçqınlar üçün sosial müavinətlərin verilməsini dayandıracaq qanun layihəsi hazırlayır.
Newscenter.az TASS-a istinadən bildirir ki, bu barədə "Rzeczpospolita" qəzeti Polşa Daxili İşlər Nazirliyinə istinadən məlumat yayıb.
Nazirliyin planlarına görə, ukraynalılara pulsuz səhiyyə və mənzil müavinətlərindən istifadə etmək imkanı verilməyəcək. Polşada müalicə alan yaralı Ukrayna Silahlı Qüvvələrinin şəxsi heyəti üçün istisna tətbiq olunacaq. Nəşr qeyd edir ki, ölkədə qanuni qalma müddətini uzatmaq üçün Ukrayna vətəndaşlarına üç illik yaşayış icazəsi təklif olunacaq. Daxili İşlər Nazirliyi həmçinin ölkəyə ilk dəfə gələn ukraynalılar üçün xüsusi statusun və müvəqqəti qorunmanın saxlanılmasını təklif edir, lakin onlara yalnız qaldıqları ilk bir neçə gün ərzində pulsuz mənzil təklif olunacaq.
Polşa Daxili İşlər Nazirliyinin məlumatına görə, respublikada xüsusi statusa malik təxminən 1 milyon ukraynalı yaşayır. Sentyabr ayında Polşa Prezidenti bu statusun son uzadılması haqqında fərman imzaladı və bu da ukraynalı qaçqınlar üçün güzəştləri məhdudlaşdırdı. Xüsusilə, pulsuz tibbi xidmətlərin siyahısı daraldıldı və işsiz ukraynalılar üçün sosial güzəştlər ləğv edildi.
Süleyman
