Rusiya ABŞ-ın Venesuelaya qarşı həyata keçirdiyi əməliyyatı silahlı təcavüz aktı kimi qiymətləndirərək, Nikolas Maduronun və onun həyat yoldaşının dərhal azad olunmasını tələb edib.
NOCOMMENT.az xəbər verir ki, bu barədə Rusiyanın BMT yanında daimi nümayəndəsi Vasili Nebenzya açıqlama verib.
Nebenzya bildirib ki, Rusiya Federasiyası ABŞ-ın Venesuela ərazisində həyata keçirdiyi əməliyyatı qətiyyətlə pisləyir və bunu beynəlxalq hüququn kobud şəkildə pozulması hesab edir. Onun sözlərinə görə, Vaşinqtonun Maduronu ələ keçirməsi açıq şəkildə zorakı müdaxilə və dövlət suverenliyinə hörmətsizlikdir.
Rusiya diplomatının fikrincə, ABŞ-ın Karakasda törətdiyi bu əməl “soyğunçuluq və quldurluq” xarakteri daşıyır:
“ABŞ tərəfindən Karakasda bu qədər açıq və kinayəli şəkildə törədilmiş cinayət üçün heç bir bəraət ola bilməz”.
O, həmçinin qeyd edib ki, beynəlxalq ictimaiyyət ABŞ-ın özünü “beynəlxalq hakim” rolunda təsdiqləməsinə imkan verməməlidir:
“ABŞ-ın dünya üzrə hökm verən tərəf kimi çıxış etməsinə yol vermək olmaz”.
Nebenzya əlavə edib ki, Moskva bu məsələni beynəlxalq platformalarda qaldırmağa davam edəcək və Maduronun saxlanılmasını təhlükəli presedent kimi qiymətləndirir.
Onun sözlərinə görə, bu hadisə beynəlxalq münasibətlər sistemində ciddi gərginlik yaradır və qlobal sabitlik üçün risklər formalaşdırır.
