Yəməndə ölkənin parçalanmasına yönəlmiş cəhdlərlə mübarizə çərçivəsində bu gündən etibarən 90 gün müddətinə fövqəladə vəziyyət elan edilib.
"Cebheinfo.az" xəbər verir ki, Yəmən Prezidentlik Şurasının sədri və Silahlı Qüvvələrin Ali Baş Komandanı Rəşad əl-Alimi verdiyi açıqlamada bildirib:
“Ölkənin bütün ərazisində 30.12.2025 tarixindən etibarən 90 gün müddətinə və uzadıla bilmək şərti ilə fövqəladə vəziyyət elan olunub”.
Qeyd olunub ki, Hadrəməvt və Mehra vilayətlərindəki bütün hərbi qüvvə və birliklər, Yəməndə qanuni hökuməti dəstəkləyən Səudiyyə Ərəbistanının rəhbərlik etdiyi Ərəb Koalisiyası ilə tam koordinasiya şəraitində, qarşıdurmaya girmədən dərhal əsas mövqelərinə və düşərgələrinə qayıtmalı və bütün mövqeləri qanuni hökumətə bağlı “Vətən qalxanı qüvvələri”nə təhvil verməlidirlər.
Hadrəməvt və Mehra valilərinə, bu iki vilayətdə idarəetməni həyata keçirmək və düşərgələr təhvil verilənədək “Vətən qalxanı qüvvələri” ilə əməkdaşlıq etmək üçün tam səlahiyyət verildiyi bildirilib.
Eyni zamanda, bu açıqlamadan etibarən 72 saat müddətində Ərəb Koalisiyası tərəfindən rəsmi icazə və təsdiq verilməyən bütün limanlar və keçid məntəqələri üçün hava, dəniz və quru qadağası tətbiq olunacaq.
Bəyanatda dövlətin bütün qurum və təşkilatlarının bu qərarı dərhal icra etməli və tam şəkildə əməl etməli olduqları vurğulanıb. Qərarın Konstitusiya, Körfəz Təşəbbüsü və onun icra mexanizmi, Prezidentlik Şurasının yaradılması və səlahiyyətlərin ötürülməsi qərarı nəzərə alınaraq və Konstitusiyanın Alimiyə verdiyi səlahiyyətlərə əsasən qəbul edildiyi qeyd olunub.
Qərarın məqsədi “bütün vətəndaşların təhlükəsizliyini qorumaq, Yəmənin birliyinə, suverenliyinə, müstəqilliyinə və ərazi bütövlüyünə sadiqliyi bir daha təsdiqləmək və 2014-cü ildən bəri davam edən legitimliyə qarşı çevrilişlə mübarizə aparmaq” kimi göstərilib.
Bəyanatda həmçinin vurğulanıb ki, bu qərar “Birləşmiş Ərəb Əmirliklərindən (BƏƏ) Yəməni parçalamaq məqsədilə şərq vilayətlərinə qarşı hərbi hücum əmri almış üsyançıların rəhbərlik etdiyi daxili qarşıdurma ilə mübarizəyə” də yönəlib.
BƏƏ tərəfindən isə hələlik bu məsələ ilə bağlı rəsmi açıqlama verilməyib.
