Danimarka Poçtu məktubların çatdırılmasını DAYANDIRACAQ
Ajans.azxəbərverirki,bubarədə Politicoməlumatyayıb. Qərarın əsas səbəbi maliyyə itkiləridir. PostNord ötən il 428 milyon Danimarka kronu (təxminən 57 milyon avro) məbləğində əməliyyat zərəri açıqlayıb. Şirkət bildirib ki, 2000-ci ildən bəri fiziki məktubların həcmi 90 faizdən çox azalıb və xidmətin dayandırılması xərc azaldılması məqsədi daşıyır. “PostNord Denmark”ın ictimaiyyətlə əlaqələr və kommunikasiya direktoru Andreas Bretvad qeyd edib ki, məktublar şirkətin tarixində mühüm yer tutsa da, Danimarka dünyanın ən rəqəmsallaşmış ölkələrindən biridir və vətəndaşların əksəriyyəti artıq fiziki məktublardan istifadə etmir. Bunun əvəzinə PostNord diqqətini elektron ticarət bağlamalarının çatdırılmasına yönəldəcək. Hazırda onlayn alış-veriş edən danimarkalıların təxminən 80 faizi bu xidmətdən istifadə edir. Danimarka qanunvericiliyinə əsasən vətəndaşların məktub göndərmək və almaq hüququ qorunur. Bu səbəbdən PostNord-un yerini özəl çatdırılma şirkəti Dao tutacaq. Yanvar ayından etibarən məktub göndərmək istəyənlər onları Dao-nun satış məntəqələrinə təhvil verəcək və şirkətin poçt nişanlarından istifadə edəcəklər. Dao bu il artıq 30 milyon məktub emal etdiyini açıqlayıb. Şirkət bildirib ki, bu xidməti göstərməkdən məmnundur və bunun üçün 110 milyon kron (təxminən 14,7 milyon avro) dövlət subsidiyası alacaq. Dao həmçinin məktub göndərişi qiymətlərini azaltmağı və gələn il tutumunu 80 milyon məktuba çatdırmağı planlaşdırır. PostNord-un qərarı təxminən 1500 iş yerinin ixtisarı ilə nəticələnəcək. Bununla yanaşı, ölkə üzrə 1500 qırmızı poçt qutusunun da istifadəsi dayandırılacaq. Bretvad bildirib ki, poçt qutuları Danimarka irsinin simvolik hissəsidir. Bu ay onların 1000-i xüsusi satışla satılıb, daha 200-ü isə yanvar ayında hərraca çıxarılacaq. Əldə olunan vəsait dünya üzrə böhranlardan zərər çəkmiş uşaqlara yardım edən xeyriyyə təşkilatlarına yönəldiləcək. Qalan poçt qutularının isə “yeni və mənalı məqsədlər” üçün qorunacağı qeyd olunub.
