Ukraynanın Müdafiə Qüvvələri Qulyaypolun bir hissəsini nəzarətdə saxlamaqda davam edir, şəhər daxilində döyüşlər gedir.
Bizim.Media xəbər verir ki, bu barədə Ukrayna Müdafiə Qüvvələrinin Cənub istiqaməti üzrə rəsmi açıqlamasında bildirilib.
“Qulyaypolda vəziyyət doğrudan da ağırdır. Şəhərin bir hissəsi Rusiya qoşunlarının nəzarətindədir. Düşmən aktiv şəkildə hücum əməliyyatları aparır, möhkəmlənmə qrupları yeritməyə çalışır. Bundan əlavə, canlı qüvvə və silahlanma baxımından ciddi üstünlüyə malikdir: kamikadze dronlardan və artilleriyadan intensiv istifadə edir, KAB-larla, NAR-larla (idarəolunmayan aviasiya raketləri – red.) aviazərbələr endirir, mövqelərimizi məhv edərək ukraynalı bölmələri şəhərdən sıxışdırmağa çalışır”, – deyə Ukrayna hərbçiləri bildiriblər.
Müdafiə Qüvvələrinin məlumatına görə, cari sutka ərzində düşmən Qulyaypolda Ukrayna Silahlı Qüvvələrinin mövqelərinə təxminən iyirmiyə yaxın hücum edib. Şəhər küçələrində hazırda da şiddətli döyüşlər gedir və bir neçə toqquşma fasiləsiz davam edir.
Bununla belə, Qulyaypolun əhəmiyyətli hissəsi hələ də Ukrayna Müdafiə Qüvvələrinin nəzarətindədir. Ukrayna bölmələri mövqelərdə qalır, müdafiə əməliyyatları aparır, əks-hücumlar həyata keçirir, düşmənin hücum qruplarını məhv etmək üçün axtarış-zərbə tədbirləri görür və qarşı tərəfə ciddi itkilər yetirir. Bildirilir ki, təkcə bu gün düşmən Qulyaypolda 300-dən çox canlı qüvvə və 60-a yaxın texnika və silah itirib.
Qeyd olunur ki, vəziyyət son dərəcə ağır olsa da, hazırda Rusiya qüvvələri Qulyaypol üzərində tam nəzarətə malik deyil.
Ukrayna Müdafiə Qüvvələri əlavə edib ki, Stepnoqorskda da Ukrayna Silahlı Qüvvələri müdafiə əməliyyatlarını davam etdirir. Orada işğalçılar qəsəbəyə aparan əsas yol boyunca sızmağa çalışır və bu istiqamətdə də şiddətli döyüşlər gedir. Eyni zamanda, Ukrayna tərəfi qəsəbənin bir hissəsinin müdafiəçilərin nəzarətində olduğunu vurğulayır.
“Putinin bəyanatları və Qerasimovun Qulyaypol və Stepnoqorskla bağlı hesabatları artıq bir neçə dəfə “ələ keçirildiyi” iddia olunan Kupyanskla bağlı vəziyyəti xatırladır. Bu cür tələsik “blitskriqlər” yaxın vaxtlarda baş tutmalı olan Ukrayna və ABŞ prezidentlərinin görüşü ilə əlaqədardır”, – deyə açıqlamada bildirilir.
Cənub Müdafiə Qüvvələri Qulyaypol və Stepnoqorsk uğrunda döyüşlərin epizodlarını əks etdirən videomaterial da yayımlayıb.
“Bu istiqamətdə Ukrayna Müdafiə Qüvvələri hər gün bir neçə yüz işğalçını zərərsizləşdirir”, – deyə Ukrayna Silahlı Qüvvələri vurğulayır.
Xatırladaq ki, Ukrayna Müdafiə Qüvvələrinin Cənub istiqaməti üzrə sözçüsü Vladislav Voloşin Rusiya işğalçı ordusunun Zaporojye vilayətində yerləşən Qulyaypol şəhərinin ələ keçirilməsini son dərəcə vacib hesab etdiyini bildirib. Bu məqsədlə Rusiya tərəfi ehtiyat qüvvələr cəlb edir və şəhərdəki binaları tamamilə dağıtmağa çalışır. Həmin istiqamətdə şiddətli döyüşlər gedir, Aleksandrovka istiqamətində də vəziyyət ağır olaraq qalır.
Bizim.Media
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
