Rusiyanın Ukraynaya qarşı başlatdığı müharibədən sonra bir sıra ölkələr sülhməramlı kontingentlərini Ukrayna ərazisinə göndərməyə hazırdırlar.
Bu barədə Ukrayna Prezidenti Aparatı rəhbərinin müşaviri Mixaylo Podolyak 25 dekabrda Telegram-da dərc olunmuş Novyny.LIVE-yə verdiyi müsahibədə bildirib.
Podolyak qeyd edib ki, Rusiyanı cilovlamaq yalnız Ukraynanın məsuliyyəti ola bilməz. Beynəlxalq tərəfdaşlar fəal şəkildə iştirak etməlidirlər: “Sual yaranır: hər şeyi kim maliyyələşdirəcək? Hər şeyi vahid sistemə inteqrasiya etmək üçün kim iştirak edəcək və Rusiyanın cilovlanması proseslərini kim moderasiya edəcək? Və sonra sual yaranır: bununla maraqlanan digər ölkələrin nümayəndələri iştirak etməlidirlərmi? Hansılar?
Böyük Britaniya, Fransa, Almaniya. Türkiyə bu işə hazır olduğunu bildirib”, – Podolyak deyib. Onun sözlərinə görə, Türkiyənin Qara dəniz bölgəsində iqtisadi və kommersiya problemləri yaradan vəziyyətlərin təkrarlanmasının qarşısını alması vacibdir. Podolyak həmçinin hesab edir ki, müharibədən sonra Avropa məkanının tamamilə yenidən formatlanması baş verəcək. “Ukrayna mümkün qədər tez Avropaya doğru irəliləyəcək. Avropa isə bu gün yaşadığı həyat tərzini yenidən nəzərdən keçirəcək. Daha zahid, militarist və anti-Rusiya olacaq”, – deyə Podolyak bildirib.
//Samir Qurbanov, Editor.az
