ain.az, Bizimyol portalına istinadən məlumat yayır.
İsrailin xarici işlər naziri Gideon Saar dekabrın 26-da ölkədə törədilən terror aktına münasibət bildirib.
Bizimyol.info xəbər verir ki, nazir hadisə nəticəsində həyatını itirənlərin ailələrinə dərin hüznlə başsağlığı verib, yaralananlara isə tezliklə sağalmalarını arzulayıb.
“Beyt-Şean və Afula ətrafında baş verən terror hücumları zamanı həlak olan insanların acısı qəlbimizi parçalayır. Ailələrin yaşadığı dərin kədəri bölüşür, yaralananlara şəfa diləyirəm”, – deyə Saar qeyd edib.
Nazirin sözlərinə görə, Fələstin Muxtariyyəti beynəlxalq ictimaiyyəti aldatmaqda davam edir. O bildirib ki, terrorçulara və onların ailə üzvlərinə maaş ödənilməsi faktiki olaraq zorakılığın təşviqi anlamına gəlir. Saarın fikrincə, bu cür siyasət terror fəaliyyətinə dolayısı ilə dəstək verir və regionda gərginliyi daha da artırır.
“Biz açıq şəkildə bəyan edirik: terror qalib gələ bilməz. İsrail öz torpağında təhlükəsizliyi və dövlət hakimiyyətini daha da möhkəmləndirməyə davam edəcək”, – deyə nazir vurğulayıb.
Xatırladaq ki, Beyt-Şean, Tel-Yosef və Afula bölgələrində baş verən hücumlar nəticəsində 19 yaşlı bir qız və 68 yaşlı bir kişi həyatını itirib. Daha bir zərərçəkən – 16 yaşlı yeniyetmə yüngül xəsarət alıb. Hücumu həyata keçirən şəxs təhlükəsizlik qüvvələri tərəfindən zərərsizləşdirilib.
Hadisə İsraildə təhlükəsizlik məsələlərinin yenidən gündəmə gəlməsinə səbəb olub və rəsmi dairələr terrora qarşı mübarizənin davam etdiriləcəyini bildiriblər.
Qadir, Bizimyol.info
Hadisənin gedişatını izləmək üçün ain.az saytında ən son yeniliklərə baxın.
