Argentina millisinin əfsanəvi hücumçusu Dieqo Maradonaya məxsus oyun forması Matchday Football Auctions hərracında 152,2 min avroya satılıb.
QOL.az xəbər verir ki, bu barədə “Mundo Deportivo” məlumat yayıb.
Sözügedən forma Maradonanın «Barselona»nın heyətində 1984-cü il İspaniya Kral Kubokunun finalında «Atletik»ə qarşı keçirdiyi oyunda (0:1) geyindiyi formadır. Qarşılaşmadan sonra baş verən kütləvi dava zamanı futbolçunun forması cırılıb.
Məlumata görə, “Barselona”nın inventar şöbəsində çalışan qadın əməkdaşlardan biri formanı soyunub-geyinmə otağında taparaq xatirə kimi saxlayıb. Daha sonra o, bu formanı tanışına hədiyyə edib və forma miras yolu ilə həmin şəxsin oğluna keçib. Dörd onillik ərzində ailədə qorunub saxlanılan forma sonradan hərraca çıxarılıb.
Qeyd olunur ki, bu forma indiyədək hərracda satılan Maradonaya məxsus klub formaları arasında ən baha qiymətə satılan nümunə olub.
Xatırladaq ki, Dieqo Maradona 2020-ci ilin noyabrında 60 yaşında vəfat edib. O, karyerası ərzində “Barselona” ilə yanaşı “Napol”,, “Sevilya”, “Boka Xuniors”, “Nyuelz Old Boyz” və “Argentinos Xuniors” klublarında da çıxış edib.
