“Avropa 2022-ci ilin fevral ayında Ukraynadakı müharibənin qarşısını ala bilərdi“.
AzPost bildirir ki, bu sözlri Macarıstanın Baş naziri Viktor Orban “Magyar Nemzet” qəzetinə verdiyi müsahibədə deyib.
“2022-ci ilin fevral ayında Avropa bu münaqişəni öz müharibəsi elan etmək əvəzinə, Moskva və Kiyevə sülh missiyası göndərə bilərdi. Əgər bu baş versəydi bu gün müharibənin kölgəsi altında yaşamazdıq. Bunun əvəzinə Avropa Amerikanın təzyiqi altında hərbi yolu seçdi”, – deyə Macarıstanın Baş naziri bildirib.
Onun sözlərinə görə, ABŞ-ın keçmiş prezidenti Co Bayden administrasiyasının müdaxiləsi mübahisənin nəticəsini müharibə tərəfdarlarının xeyrinə həll etdi.
“Bu gün yeni prezident sülh istəyir. Bu, narahatedici bir əlamətdir. Avropa strateji qərarlarını Amerikanın daxili siyasi dövrlərinə əsaslandırmamalıdır. Amerika ilə münasibətlər vacibdir, lakin Avropa işlərində biz yalnız Avropa maraqlarından irəli gəlməliyik”, – deyə o bildirib.
Macarıstanın Baş naziri həmçinin hesab edir ki, Avropa Birliyi hazırda parçalanma vəziyyətindədir.
Orban bildirib ki, Brüssel bürokratiyasının imperiya ambisiyalarının güclənməsi ilə üst-üstə düşən parçalanma prosesi gedir: “Birlik belə dağılır: qərarlar Brüsseldə qəbul edilir, lakin onlar həyata keçirilmir. Əvvəlcə bir ölkə onları həyata keçirmir, sonra iki ölkə, sonra üç ölkə. Mərkəzləşdirilmiş hakimiyyəti gücləndirmək niyyətinə baxmayaraq, qərar qəbul edənlər daim geri çəkilməyə məcbur olurlar”.
