2025-ci ildə Çin qlobal neft qiymətlərinə OPEC+ ölkələrindən daha çox təsir göstərməyə başlayıb.
HİT.az xəbər verir ki, bunu "Reuters"in enerji və Asiya əmtəə analitiki Klayd Rassel bildirib.
"Dünyanın ən böyük neft idxalçısı statusundan istifadə edən Çin, əsasən, anbarlarına daxil olan xam neftin həcmini artırmaq və ya azaltmaqla qiymətin minimum və maksimum həddini müəyyən edib", deyə ekspert hesab edir.
O qeyd edir ki, OPEC+-in 2022-ci ildə hasilatın azaldılması, o cümlədən Rusiya tərəfindən edilən azaltmalar qlobal neft qiymətlərini dəstəkləyib. Lakin OPEC+ bu ilin aprel ayında azaltmalarını ləğv etməyə başlayan kimi qiymət artımı dayanıb.
İndi, yaxınlaşan neft bolluğu ilə qarşılaşan OPEC+ gözləmə yanaşması qəbul etmək qərarına gəlib və gələn ilin birinci rübündə hasilat səviyyələrini mövcud səviyyədə saxlamağı hədəfləyir: "Beləliklə, Çinin etməli olduğu tək şey artıqlığını idarə etməkdir", - deyə cənab Rassel hesab edir. Onun fikrincə, Çinin 2026-cı ildəki hərəkətləri "hazırda qlobal neft bazarında ən böyük sirrdir və digər bazar iştirakçıları, ehtimal ki, Pekinin hərəkətlərinə cavab olaraq strategiyalarını dəyişdirəcəklər".
Əgər Pekin son zamanlar etdiyi eyni sürətlə strateji ehtiyatlarını artırmağa davam edərsə, bu, 2026-cı il üçün proqnozlaşdırılan neft artıqlığının böyük bir hissəsinin Çin anbarlarında qalacağı anlamına gələcək. Əgər bu baş verərsə, Çin, çox güman ki, yenidən neft qiymətlərini ən aşağı səviyyədə saxlayacaq.
"Çin inventar hərəkətlərindən qiymət mexanizmi kimi istifadə etməyə hazırdır. Çinin dəniz yolu ilə xam neft daşınması gündə təxminən 10 milyon bareldir - bu, qlobal dəniz həcminin təxminən dörddə birini təşkil edir. Buna görə də, Pekinin siyasətinin hazırda neft bazarlarında ən vacib amil olması tamamilə mümkündür", deyə "Reuters" eksperti yekunlaşdırıb.
Samir
