Fanat portalından verilən məlumata əsasən, ain.az bildirir.
1-ci Liqa təmsilçisi "Zaqatala"nın 12-ci turunda MOİK-ə 1:3 hesabı ilə uduzduğu oyundan sonra texniki məğlubiyyətlə cəzalandırılması maraqlı bir sıra üzücü məqamların da ortaya çıxması ilə nəticələndi. Məlum oldu ki, legioner limitini pozan meydan sahibləri əsasnamədə yazılanları tam şəkildə dərk edə bilmədikləri üçün yanlışlığa yol veriblər. Belə ki, bölgə təmsilçisinin baş məşqçisi Fanat.Az-a açıqlamasında maarifləndirməyə ehtiyac olduğunu vurğulayıb, limitin pozulduğu oyunçu dəyişikliyindən öncə isə həm 4-cü hakimə, həm də AFFA nümayəndəsinə dəqiq bilmədikləri məqamla bağlı müraciət ünvanladıqlarını deyib.
Öncə Məmmədovun dediklərini xatırladaq: "Habibu Abdurəşid 53-cü dəqiqədə qırmızı vərəqə alandan sonra yerli futbolçu Roini İsmayılovu digər legioner Matondo Lumbu Preddi ilə əvəzlədik. Legioner limitinin 8+3 olduğunu təbii ki, bilirik. Amma həmin vaxt çaşqınlıq yarandı. Çünki Əsasnamədə bu məqam ətraflı şəkildə izah olunmayıb. Texniki məğlubiyyətin səbəbi bir qarşılaşmada 4 legionerin meydana çıxmasıdır. Başqa sözlə, eyni vaxtda yerlilərin sayının 8 yox, 7 olması bu cəzanın verilməsi ilə nəticələndi.
Əslində, dəyişikliyi etməmişdən əvvəl həm 4-cü hakimdən (Ruslan Quliyev), həm AFFA nümayəndəsindən (Mübariz Hüseynov) yerlini legionerlə əvəzləməyin qayda pozuntusu olub-olmadığını soruşduq, onlar da bilmədilər. Hakim-inspektor isə yuxarıda klubun prezidenti Şaban Şirdanovun yaxınlığında idi. O da konkret nəsə demədi. Onları suçlamaq niyyətindən uzağam, günahı kiminsə üstünə atmırıq. Dediyim budur ki, belə bir kuryoz vəziyyət yarandı. Problem maarifləndirmədədir. Yəni əsasnamədə yazılanların bəzilərini ətraflı izah etmək də lazımdır. Bu, ümumi problemdir. Uduzduğumuzu nəzərə alsaq, texniki məğlubiyyəti faciə saymırıq. Amma qalib gəlsəydik, hər şey başqa cür olacaqdı".
Əsasnaməni nəzərdən keçirək
Bununla bağlı Əsasnamədə konkret bəndlər mövcuddur. Belə ki, Əsasnamənin 3-cü maddəsənin 13.1 və 13.2 bəndlərində qeyd olunur ki, I Liqada limit 8+3 prinsipinə uyğun olaraq müəyyənləşdirilir. Start heyətdə (ilk 11-lik) 8 nəfər Azərbaycan vətəndaşı olan futbolçu yaş limiti olmadan iştirak edə bilər. Start heyətdə (ilk 11-lik) maksimum 3 legioner futbolçu ola bilər. Əgər komanda 11 futbolçudan az oyunçu ilə meydana çıxmaq məcburiyyətindədirsə, bu zaman legioner futbolçu limiti pozulmamalıdır. Həmin maddənin 15-ci bəndində isə qeyd olunur ki, əvəzetmə zamanı limit pozulmamalıdır. 19-cu bəndin 6-cı alt bəndinə görə isə əvəzetmə zamanı futbolçulara tətbiq olunan limit pozularsa, bu zaman məsələ AFFA İntizam Komitəsində müzakirəyə çıxarılır.
Hamı səhv edə bilər, amma...
Gördüyünüz kimi, adam matçın məsul şəxslərinin komandaya doğru ilə yanlışın fərqini izah edə bilmədiklərini, başqa sözlə əsasnamədən xəbərsiz olduqlarını dilə gətirib. Şübhəsiz, hamının səhv etməsi mümkündür, üstəlik, "Zaqatala"nı texniki məğlubiyyətdən xilas etmək 4-cü hakimlə AFFA nümayəndəsinin görməli olduğu iş deyil. Lakin bu şəxslərin onlardan yardım istəyənlərə əsasnamənin tələbləri ilə bağlı dolğun məlumat verməyi bacarmaması gülünc reallıqdır. Başqa sözlə, biabırçılıq. Belə çıxır ki, oyunun rəsmilərinin nəyi nə dərəcədə bildikləri yoxlanılmır. Əslində, bu adamların hər biri imtahan verəndən sonra matçlara təyin olunurlar. İmtahan ərəfəsində öyrəndiklərini unudublarsa, deməli, ya imtahan arzulanan səviyyədə götürülməyib, ya da əsasnamədə yazılanlar çox qəlizdir. Hə, klubların daha yüksək səviyyədə maarifləndirilməsinə də xüsusi ehtiyac var. Yəni bu işin məsuliyyətini çiyinlərinə götürənlər futbol yarışlarında növbəti kuryoz halların, anlaşılmazlıqların qarşısını almaq üçün maarifləndirməni də yeni səviyyəyə çatdırmalıdırlar.
Nihat
Abunə Ol
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
