Xankəndi — adı uzun müddət ağrı, itkilər və ədalətsizliklə assosiasiya olunan bir şəhər idi. Bu gün isə Xankəndi yaddaşın, ləyaqətin və inamlı gələcəyin məkanına çevrilir. Azərbaycan Prezidenti İlham Əliyevin Xankəndidə Zəfər Parkının açılışında iştirakı dərin siyasi və tarixi məna daşıyır.
Bu hadisəyə xüsusi rəmzi çalar verən məqamlardan biri də dövlət başçısının doğum gününü məhz burada — azad edilmiş, sürətlə dirçələn Xankəndidə qeyd etməsidir. Bu, sadəcə tarixlərin üst-üstə düşməsi deyil. Bu, liderin şəxsi taleyinin ölkənin taleyi ilə ayrılmaz şəkildə bağlı olduğu bir dövrün təcəssümüdür; Prezidentin doğum günü isə milli qürur gününə çevrilir.
Zəfər Parkının açılışı Azərbaycanın suverenliyinin və ərazi bütövlüyünün bərpası uğrunda canlarını fəda etmiş bütün oğul və qızlarımızın əziz xatirəsinə ehtiramdır. Onların qəhrəmanlığı dövlətimizin tarixinə əbədi həkk olunub, adları isə milyonlarla azərbaycanlının qəlbində yaşayır. Məhz onların şücaəti və fədakarlığı sayəsində bu gün yaşadığımız tarixi reallıq mümkün olub.
Azərbaycanın ərazi bütövlüyünün bərpası 2020-ci ilin 44 günlük Vətən müharibəsinin və 2023-cü ildə həyata keçirilmiş birgünlük antiterror əməliyyatının nəticəsidir. Bu hadisələr təkcə regionun hərbi-siyasi xəritəsini dəyişmədi, eyni zamanda beynəlxalq hüququn və BMT Təhlükəsizlik Şurasının qətnamələrinin pozulmasına əsaslanan uzunmüddətli münaqişəyə son qoydu.
Bu taleyüklü qələbələrin hamısı Azərbaycan Prezidentinin, Ali Baş Komandan İlham Əliyevin siyasi iradəsi, strateji düşüncəsi və qətiyyəti sayəsində mümkün oldu. Onun adı haqlı olaraq ölkəmizin tarixi qələbələri, ədalətin və milli ləyaqətin bərpası ilə assosiasiya olunur. Onun rəhbərliyi altında Azərbaycan yalnız suverenliyini bərpa etmədi, həm də azad edilmiş ərazilərin genişmiqyaslı quruculuq və dirçəliş mərhələsinə inamla qədəm qoydu.
Xankəndi bunun bariz nümunəsidir. Bu gün burada infrastruktur layihələri həyata keçirilir, yeni şəhər mühiti formalaşdırılır, dinc və ləyaqətli həyat üçün şərait yaradılır. Zəfər Parkı bu prosesin mühüm tərkib hissəsinə çevrilir — yaddaş və tərbiyə məkanı, gələcək nəsillərin azadlığın qiymətini və dövlətçiliyin əhəmiyyətini dərk edəcəyi bir ünvan kimi.
Məhz buna görə də İlham Əliyevin doğum günündə azad edilmiş Xankəndidə Zəfər Parkını açması dərin rəmzi məna daşıyır. Bu şəhərin üzərində bundan sonra və əbədi olaraq Azərbaycan bayrağı qürurla dalğalanacaq — xalqımızın tarixi seçiminin qəti qələbəsinin, suverenliyin və dönməzliyin rəmzi kimi. Bu gün bir daha təsdiqlədi ki, Azərbaycan qalib dövlətdir və onun gələcəyi keçmişin yaddaşı, milli birlik və güclü liderlik üzərində qurulur.
Ülvi Quliyev
Milli Məclisin deputatı
