Ankara, 24 dekabr, AZƏRTAC
Liviya hərbi ekspertlərindən ibarət qrup dekabrın 24-də Türkiyənin paytaxtı Ankara şəhərindən 100 kilometr cənubda yerləşən əraziyə gəlib. Məqsəd Liviya Müdafiə Nazirliyinin nümayəndə heyətinin üzvləri də daxil olmaqla, 8 nəfərin ölümünə səbəb olan təyyarə qəzası ilə bağlı istintaqı əlaqələndirməkdir.
AZƏRTAC xəbər verir ki, ekspertlər Liviya hökumətinin tapşırığı ilə Türkiyəyə gəliblər və Haymana rayonunun Kesikkavak kəndi yaxınlığında təyyarənin qalıqlarına baxış keçirirlər.
Qəza yeri jandarma qüvvələri tərəfindən mühasirəyə alınıb, yerli vaxtla səhər saat 3:20-də aşkar edilən uçuş məlumatlarını qeyd edən cihaz deşifrə üçün Ankaraya çatdırılıb.
Türkiyənin Ədliyyə Nazirliyi tərəfindən təyyarə qəzası ilə bağlı açılan cinayət işi 4 prokurora həvalə edilib.
Ramin Abdullayev
AZƏRTAC-ın xüsusi müxbiri
Ankara
