ain.az, sport24.az portalına istinadən məlumatı açıqlayır.
"Xankəndi"nin idman direktoru Vasif İsmayılov Sport24.az-a geniş müsahibə verib. O, komandanın İkinci Liqadakı uğurlu çıxışından, stadion probleminin yaratdığı çətinliklərdən, azarkeş dəstəyindən və "Xankəndi" adının daşıdığı dərin mənəvi məna barədə danışıb.- Vasif müəllim, ötən mövsüm Region Liqasındakı uğurlu çıxışdan sonra komanda bu mövsüm İkinci Liqada da iddialıdır və qış fasiləsinə liderlər sırasında yollanır. Bu nəticələri necə dəyərləndirirsiniz?- Region Liqasındakı yolumuz sanki bir göz qırpımında keçdi. Bu mövsüm isə artıq İkinci Liqada çempionatın ekvatorunu geridə qoymuşuq və çempionluğa əsas namizədlərdən biriyik. Bu fakt göstərir ki, klubda görülən işlər düzgün istiqamətdə aparılır və seçilən strategiya öz bəhrəsini verir.- Komanda Region Liqasında oyunlarını Şamaxı Olimpiya İdman Kompleksinin stadionunda, İkinci Liqanın ilk dövrəsində isə "Palms Sports Arena"nın 4-cü meydançasında keçirir. Məşqlər də müxtəlif stadionlarda təşkil olunur. Bunun səbəbi nədir?- Ən yaralı yerimizə toxundunuz. Stadion məsələsi hazırda klubumuzun ən ciddi problemlərindən biridir. Bakıda həm oyunlar, həm də məşqlər üçün uyğun və boş stadion tapmaq olduqca çətindir. Tapıldıqda isə ya vaxt problemi yaranır, ya da digər texniki maneələr ortaya çıxır. Bu vəziyyət həm komandanın hazırlığına, həm də klubun büdcəsinə əlavə yük yaradır.- Ev oyunlarını doğma şəhərinizdə keçirmək bu problemi aradan qaldıra bilər. Azarkeşlər sizi nə zaman Xankəndi stadionunda görə biləcəklər?- Bu, bizim ən böyük arzumuzdur. Rəqiblərimizi doğma şəhərimizdə, öz azarkeşlərimizin qarşısında qəbul etmək istəyirik. Ümid edirik ki, bu arzu uzaqda deyil və yaxın zamanda reallaşacaq. Büdcəmizin böyük hissəsi hazırda stadion məsələsinə sərf olunur. Ev oyunlarımızı və məşqlərimizi Xankəndidə keçirə bilsək, bu, klub üçün həm mənəvi, həm də maddi baxımdan böyük üstünlük olacaq.- Bildiyimizə görə, bununla bağlı aidiyyəti qurumlara müraciət etmisiniz...- Bəli, İkinci Liqa başlamazdan əvvəl Gənclər və İdman naziri cənab Fərid Qayıbova rəsmi müraciət etmişik. Hazırda məsələ icraatdadır. Qeyd etməliyəm ki, həm Gənclər və İdman Nazirliyi, həm də AFFA və PFL tərəfindən bu təşəbbüs müsbət qarşılanır. Bu da bizə ümid verir ki, Birinci Liqaya vəsiqə qazandığımız halda ev oyunlarımızı artıq Xankəndi şəhərində keçirəcəyik. Onu da qeyd edim ki, komanda olaraq Xankəndi şəhərinə səfər etmək məqsədilə Yeni ildən dərhal sonra aidiyyəti dövlət qurumlarına rəsmi müraciət edəcəyik. Bu səfər doğma şəhərimiz, stadionumuz və azarkeşlərimizlə yaxından tanışlıq xarakteri daşıyacaq.- Klubun sosial şəbəkələrdə geniş azarkeş dəstəyi qazandığını da görürük...- Doğrudur. Artıq kifayət qədər geniş azarkeş kütləmiz formalaşıb. Xankəndi şəhərində fəaliyyət göstərən Qarabağ Universitetinin nəzdində tələbələrdən ibarət Fan Klubun yaradılması isə bizim üçün xüsusi qürur mənbəyidir. İnanırıq ki, gələn mövsümdən etibarən fanatlarımız bizi doğma stadionumuzda daha gur səslə dəstəkləyəcəklər.- Klubun gələcək hədəfləri barədə nə deyə bilərsiniz?- İkinci Liqada əsas məqsədimiz çempionluqdur. Uzunmüddətli hədəfimiz isə "Xankəndi" Futbol Klubunu Premyer Liqaya yüksəltmək və Azərbaycanı beynəlxalq arenalarda layiqincə təmsil etməkdir.- Sonda bilmək istərdik: "Xankəndi" adı sizin üçün nə ifadə edir?- "Xankəndi" adı mənim üçün sadəcə bir şəhərin və ya bir futbol klubunun adı deyil. Bu ad tarixdir, yaddaşdır, mübarizədir və qürurdur. "Xankəndi" deyəndə yalnız bir məkan yox, illərlə həsrətində olduğumuz torpaqlar, yaşadığımız ağrılar, çəkdiyimiz çətinliklər və nəhayət, əldə etdiyimiz qələbə yada düşür. Bu ad altında fəaliyyət göstərmək böyük məsuliyyətdir. Biz hər oyuna çıxarkən təkcə üç xal uğrunda yox, Xankəndinin adını layiqincə təmsil etmək, bu şəhərin ruhunu, gücünü və qayıdışını bütün ölkəyə göstərmək üçün mübarizə aparırıq. "Xankəndi" Futbol Klubu, mənim üçün, idmanın dili ilə verilən bir mesajdır — bu torpaqlar yaşayır, bu şəhər dirçəlir və gələcəyə inamla addımlayır. Əminəm ki, yaxın gələcəkdə komandamız Xankəndi Şəhər Stadionunda meydana çıxanda, bu adın daşıdığı bütün mənalar daha da aydın hiss olunacaq. O gün futbol sadəcə oyun olmayacaq — bu, tarixə, ədalətə və qürura çevrilmiş bir an olacaq. "Xankəndi" futbol klubunun bundan sonra ev oyunlarını yenicə əsaslı təmirdən çıxmış Xankəndi şəhər stadionunda keçirməsi ilk növbədə dərin mənəvi məna daşıyır. Uzun illər işğal və tənəzzül damğası kimi xatırlanan bu şəhərdə Azərbaycan klubunun rəsmi oyunda meydana çıxması tarixi ədalətin və milli qürurun real təcəssümüdür. Klubun İkinci Liqada uğurlu debütü və ilk dövrədən sonra turnir cədvəlinə başçılıq etməsi bu mənəvi yükü daha da gücləndirir. Stadionda keçirilən hər oyun təkcə idman hadisəsi deyil, həm də Qarabağın dirçəlişinin canlı göstəricisi olacaq. Son üç il ərzində Xankəndidə həyatın yenidən canlanması, əhalinin sürətlə məskunlaşması bu futbol və idman prosesinə real sosial baza yaradır. Bu baxımdan "Xankəndi" FK-nın doğma şəhərdə çıxış etməsi şəhər sakinləri üçün həm bayram olacaq, həm də birlik, ümid və gələcəyə inam mənbəyinə çevriləcək. Xankəndi kimi urbanizasiyalaşmış bir şəhər nə futbolsiz, nə də klubsuz qala bilər. Eyni zamanda klubumuzun Xankəndi şəhər stadionunda oyunlar qəbul etməsi ciddi idman və siyasi çalarlar daşıyan bir futbol hadisəsi kimi qiymətləndirilməlidir. Azərbaycan futboluna məxsus bir klubun Xankəndidə rəsmi oyunlar keçirməsi ölkənin suverenliyinin və institusional varlığının idman müstəvisində təsdiqidir. Qarabağ Universitetinin tələbələrinin artıq fan klub yaratması və klub rəhbərliyi ilə planlaşdırılan görüşlər futbolun gənclər üçün sosial inteqrasiya vasitəsinə çevrildiyinin nümayişi olacaq. Stadionun tribunalarında yerli əhali, tələbələr və azarkeşlərin bir araya gəlməsi şəhərin ictimai həyatına yeni dinamika və rəng qatacaq. Hesab edirik ki, "Xankəndi" FK-nın şəhər əhalisinə və futbolsevərlərə rəsmi təqdimatı regional futbol mədəniyyətinin formalaşması baxımından mühüm mərhələdir. Bu proses Qarabağın yalnız iqtisadi və sosial deyil, eyni zamanda idman və simvolik baxımdan da Azərbaycanın ayrılmaz bir hissəsi olduğunu nümayiş etdirir. Nəticə etibarilə, Xankəndi şəhər stadionunda keçiriləcək hər oyun müasir Azərbaycan tarixinin futbol dili ilə yazılan bir səhifəsinə çevriləcək.
Sonrakı hadisələr barədə daha çox məlumat almaq üçün ain.az saytını izləyin.
