Pakistan və Liviya 4 milyard dollardan çox məbləğdə hərbi texnika satışı barədə razılığa gəlib. Bu barədə Reuters agentliyinə Pakistanın dörd rəsmi nümayəndəsi məlumat verib. Razılaşma Liviyaya silah tədarükünə dair BMT-nin qüvvədə olan embarqosuna baxmayaraq əldə olunub.
Agentliyin mənbələrinə görə, bu sövdələşmə Pakistanın silah ixracı tarixində ən iri müqavilələrdən biridir. Müqavilə Pakistan ordusunun baş komandanı general Asim Munirin Liviya ordusunun baş komandanının müavini Səddam Xəlifə Haftar ilə Benqazi şəhərində keçirdiyi görüşdən sonra yekunlaşdırılıb.
Agentliyin tanış olduğu ilkin materialların surətinə əsasən, 16 ədəd JF-17 qırıcı təyyarəsinin və 12 ədəd Super Mushak təlim-məşq təyyarəsinin tədarükü müzakirə olunub. Məmurlardan biri siyahının həqiqiliyini təsdiqləyib. Digəri isə bildirib ki, göstərilən sistemlər saziş paketinə daxildir, lakin dəqiq həcmlər hələ dəyişdirilə bilər.
Reuters-in mənbələri qeyd edir ki, müqavilə 2,5 il müddətinə hesablanıb və quru, dəniz və hava qüvvələri üçün texnika tədarükünü əhatə edir. İki mənbə sövdələşmənin dəyərini 4 milyard dollardan çox, digər ikisi isə 4,6 milyard dollar olaraq qiymətləndirib.
Liviya 2011-ci ildə BMT tərəfindən tətbiq edilmiş silah embarqosu altındadır və bu embarqo silahların ötürülməsi üçün xüsusi beynəlxalq razılıq tələb edir.
