Bakı, 23 dekabr, AZƏRTAC
Çinin “ByteDance” şirkəti amerikalı rəqibləri ilə ayaqlaşa bilmək üçün süni intellekt infrastrukturuna 2026-cı ildə 23 milyard dollar sərmayə qoymağı planlaşdırır.
AZƏRTAC xəbər verir ki, “Financial Times” qəzetinin yaydığı məlumata görə, süni intellekt üzrə qlobal lider olmağa çalışan “TikTok” sosial şəbəkəsinin sahibi 2025-ci ildə bu sahəyə 21 milyard dollardan çox sərmayə yatırıb. Şirkətdən bildiriblər ki, gələn il üçün nəzərdə tutulan məbləğin təxminən yarısı süni intellekt modellərinin və tətbiqlərinin inkişafı üçün qabaqcıl yarımkeçiricilərin alınmasına sərf olunacaq.
Çin şirkətlərinin əvvəllər ABŞ-ın ixraca nəzarət məhdudiyyətləri ilə üzləşməsi onların bazarda liderlik edən “Nvidia” çipləri almasına mane olub. Amerika şirkətlərinin Çinə qabaqcıl prosessorlar tədarükünə etməsinə qadağa Co Bayden administrasiyası dövründə qoyulub. Bu da “ByteDance” və “Alibaba” kimi şirkətləri daha az hesablama gücü tələb edən ucuz və səmərəli modellər hazırlamağa sövq edib.
